Rawthing tam vanga Sazu puang nia hriat vangin Mizoram-a khaw 138 in harsatna an tawk tawh

Kumin hian Mizoram hmun hrang hrangah Rawthing a tam leh mek a, hriat theih chinah Rawthing Tam avanga Sazu puang avangin khaw 138 velin harsatna an tawk tawh a, Lunglei District chhunga khaw thenkhat ah chuan tunkar Zirtawpni khian Sazu hrai runpui (mass poisoning) kalpui turin ruahmanna siam a ni.

Tunhma lam atanga Mizoram in Tam a tawh thin, Rawthing tam avangin Mizoram-ah harsatna a thleng chho leh tan mek niin a lang a, mithiam ten an chhinchhiah danin kum 1881 khan Mizoram-ah Thingtam hi thlengin hemi hnu kum 1929 leh 1977-ah te Thingtam hi a lo thleng tawh a, hemi anga chhut hian kumin, 2025 hi Thingtam thlen leh hun tura ngaih niin Mizoram hmun hrang hrangah Sazu a puang leh mek a, hriat theih chinah Rawthing Tam avanga Sazu puang hian Mizoram-a khaw 138 velah harsatna a thlen tawh a, Agriculture Department chuan DAO kaltlangin farmer te hnenah Sazu tur—Bromadiolone, Zinc Phosphide te tam tham tak a sem tawh a, sem tur hmabak pawh engemaw zat a la awm a. Sazu puang nasatna khuaah te chuan VC te nen tangkawpin Department chuan ‘Rodent Mass Poisoning’ an kalpui tawh bawk a ni.

Nimin khan Agriculture & Farmers’ Welfare Department Minister PC. Vanlalruata chuan a Office-ah Department Official pawimawh te kokhawmin, tunhnai Rawthing Tam avanga Sazu puang chungchang an sawiho a, District hrang hranga hmalakna kal mek te thlirhona neiin hmalak zel dan turte ngaihtuahho a ni bawk a. He hunah hian Agriculture & Farmers’ Welfare Department Secretary Ramdinliani IAS; Director R. Lalnunzira te leh Officer dang engemaw zat an tel a ni.

Hetihlai hian Lunglei District Agriculture Office (DAO) chuan Thingtam avanga Sazu a puang nia report an dawn bawhzuiin tunkar Zirtawpni, October ni 3, 2025 khian Lunglei District chhunga khaw thenkhatah Sazu hrai runpui (Mass Poisoning) kalpui turin ruahmanna an siam a. Hemi atan hian Team pathum siamin Team 1-na in Thingfal, Mamte leh Thlengang; Team 2-na in Tawipui North-I, Tawipui North-II leh Mualcheng South leh Team 3-na in Ramlaitui te an tuam ang. Sazu an hraina tur khaw pasariha khawtlang hruaitute chu Sazu hrai ni atang hian an khua theuhvah Sazu/Chepa rep zawrh leh thawnchhuah turte fimkhur taka ven sakin, a sa pawh ei lo tura hma laksak tur leh venpui turin a ngen bawk a ni.