Rampum-ah Faina chungchanga hmalakna tan a ni

Swachhata Hi Seva hmalakna kal mek hnuaia ‘Faina Hapta’ leh ‘Faina Hnatlang runpui’ chu nimin khan Mizoram hmun hrang hrangah huaihawt a ni.
Aizawl-ah chuan nimin zing khan MINECO Open Gym tual-ah Swachhata Hi Seva hmalakna kal mek hnuaia Faina Hnatlang, Mahatma Gandhi pianchamphaphak October 2 thlenga neih tur hawnna hi neih niin UD&PA Minister K. Sapdanga chuan a hmanpui a, Faina Hnatlangpui hi October ni 2, Mahatma Gandhi pianchampha thlenga neih tur niin ‘Ek Din, Ek Ghanta, Ek Saath’ tia hming phuah a ni a, Minister K. Sapdanga chuan Veng, khawtlang, Pawl, Zirna In te, Kohhran leh sawrkar Department anga Faina Hapta chhungin hma la ho turin ngenna a siam a. Faina Hapta khuh hawnnaah hian HDFC Bank chuan CSR Fund kaltlangin khawlaia bawlhlawh hip khawmna lirthei - Garbage Vacuum Truck chu UD&PA Minister hnenah an hlan nghal bawk a ni.

He hunah hian Minister K.Sapdanga chuan Faina chungchang chu inzirna tam hle tawh mahse Faina chu mitinin nunpui theuh a, Faina in min chenchilh a ngai tawh tih a sawi a. Faina Hapta hman chhungin khua leh tui te chuan mahni awmna hmun theuhah phur takin faina kawngah hmalak theuh bakah Faina Hapta a liam hnu pawhin faina ngaih pawimawh chhunzawm zel a ngaih thu a sawi a ni.

Serchhip-ah pawh 'Ek din, Ek Ghanta,Ek saath' tih thupui a hmangin 'Nationwide Shramdaan' chu nimin khan hman a ni a, nimin zing khan Serchhip khawpui chhung VC Area hrang hrangah 'Ek din, Ek Ghanta, Ek saath' tih thupui a hmangin Faina hnatlang neih a ni a, tukthuan eikham lamah sawrkar Pisa hrang hrangte bakah Kohhran te pawhin hnatlang neiin an hmunhma te thenfai hna an thawk bawk a ni.