Sum hmanna tura dah tel phutin sawrkar ngaichang

Aizawl City College Joint Students' Union (ACCJSU) chuan sawrkarin tuialhthei man-a Cess a lak a hmanna tur Social Infrastructure and Services hnuaiah College zirna emaw, Higher & Technical Education Department lam telh ngei nise an duh thu an sawi.

Hemi chungchanga thu-chhuah an siamah ACCJSU chuan Mizoram sawrkar in Mizoram Value Added Tax (Amendment) Rules, 2024 a tihchhuah hmanga Diesel leh Petrol Litre 1 zela Road Maintenance-na atan Rs. 2 leh Social Infrastructure and Services atan Rs. 2 bawk Cess (Chhiah) a lakah Road Infrastructure Cess hi Road Fund Act, 2007 nena kalkawpa lak niin kawng siamthatna atana hman tur, Mizoram Road Fund Board-ah hlan tur a ni tih an sawi a. Social Infrastructure and Services atana Cess khawnkhawm te hi Human Resources Development Infrastructure; Development of wellness infrastructure; Skills Development leh Women Centric Projects-ah te la sem leh tur niin ‘Human Resources Development Infrastructure’ a tih hnuaiah hian ‘Degree Colleges’ tih pawh a tel thu an sawi.

Hetihlai hian Social Infrastructure and Services hnuaia Department/Sector te hnena sum pek dan tur semna atan Mizoram Finance Department in August 21, 2025-a Notification a tihchhuah ah sum dawng ve thei zingah College zirna emaw, Higher & Technical Education Department lam a tel ta lo nia sawiin, “Human Resources Development Infrastructure tih hi School Education Department-ah chauh an kaltir zo ta vek a, pawi kan tiin kan rilru a na hle,” an ti a. He sum hmanna turah hian Degree College/Higher & Technical Education lam in chan tur a neih ve ngei theihna turin Mizoram sawrkar thuneitute hmala turia ngenin, chawlhkar khat (ni 7) chhung an ngaichang dawn tih pawh an tarlang bawk a ni.