Cheng vbc. 26 senna hman tangkai a nilo tih sawi

Cheng vaibelchhe 26 senga sak Mizoram Engineering College (MEC), Pukpui Lunglei chu thawktu (staff) leh sum hman tur awm loh avangin a nihna tur anga hman tangkai a ni lo niin CAG report chuan a tarlang.

Comptroller and Auditor General (CAG) of India Report thar ber August ni 27, 2025-a Mizoram Legislative Assembly-a pharh takin a tarlan danin sawrkar laipui, Ministry of Human Resources Development hnuaia Rashtriya Uchchattar Shiksha Abhiyan (RUSA) kaltlangin Lunglei-a Mizoram-a Engineering College hi cheng vbc. 26 a din remtih a ni a. Ruahman dan chuan he College hi thalai ten thiamna leh Degree sang zawk an neih theihna atan te, Polytechnic zirlai ten an zir chhunzawm zelna tur leh sawrkar hnathawkte pawhin an thiamna an chher hriamna hmun tur atana duan a ni a. Ruahman dan chuan kum 2018-19 atanga hawn tan tum a ni.

Engineering College sakna atan hian February ni 12,2015-ah inremna (MoU) ziah a ni a, April ni 5,2016-ah Work Order pekchhuah a ni a. College sakna tur hi sawrkar laipui leh state sawrkar ten 90:10 hmanga an thawh tur niin sawrkar laipui tum tur cheng vbc. 23.40 pawh pekchhuah nghal a ni a. College sak hna hi April ni 22, 2016-ah tan a niin November ni 16, 2018-ah zawhfel tur a ni a, a sak hna hi M/s Mizoram Technocrats Company (P) Ltd. chuan an thawk a. Cheng vbc. 26 hmang hian Administrative Block, Administrative building, Boys & Girls Hostel, Laboratory & Workshop, Library, Common Room leh Cafetaria te sak tura ruahman a ni bawk.

Audit report tarlan danin cheng vbc. 26 hi building sakna tur liau liau a ni a. Hetihlai hian Engineering College hi a taka hnathawk tur chuan zirtirtu leh thawktu dang a ngai a, hemi atana sum mamawh dilna pawh Mizoram sawrkarah thehluh a ni a. Mahse Finance Department in March ni 20, 2014 a hna thar siam leh hnawhkhah khapna a lo siam tawh avang leh sum dinhmun harsatna avangin RUSA lam dilna chu tih hlawhtlin theih a nih loh thu May ni 6, 2020 khan a hriattir a. Hei vang hian CAG in audit an neih lai, March 2024 thleng khan cheng vbc. 26 senna Engineering College chu kum 5 hnuah pawh hman theih a la ni lo tih a tarlang bawk a. Mizoram Engineering College-ah hian eng leh tui a la awm loh avang leh a panna kawng hi siamthat a nih loh avangin lirthei kal vel tan pawh a buaithlak hle a. Chuvangin a tul anga hmachhawp la awmte enfiah rang turin CAG chuan state sawrkarah rawtna a siam a ni.

Hetihlai hian Mizoram sawrkar chuan Mizoram Engineering College hi a taka kalpui turin hma a la leh mek a, kumthar (2026) atangin Class kalpui tan tum niin Building sak zawh tawh thawmthat ngai leh a panna kawng siam thatna leh mamawh hrang hrang atan sum pawh a dah tawh a ni.