‘Ginger Processing Unit’ dinna turin thuthlung ziak

Champhai District chhung Khuangleng khuaa Sawhthing sawngbawlna, ’Ginger Processing Unit’ dinna turin Inrinni khan Mizoram sawrkar leh Opikpure Pvt. Ltd. te chuan thuthlung an ziak.

Ginger Processing Unit dinna tur thuthlung hi Adviser to Chief Minister Dr. KC Lalmalsawmzauva Pisa-ah ziah niin Mizoram sawrkar aiawhin Commerce & Industries Department-a Joint Secretary Pinky Zosangpuii leh Opikpure Pvt. Ltd. atangin Managing Director te chuan an hming an ziak a ni. Mizoram Sawrkar leh Opikpure Pvt.Ltd. ten thuthlung an siam ah hi Industrial Estate hmun, Khuangleng-ah kum 10 chhung Sawhthing sawngbawlna din leh kalpuina tur a ni a. Hemi atan hian Opikpure Pvt. Ltd. te chuan Industrial Estate ram chu Sawrkar bituk rate angin man chawiin an luah hawh dawn bakah thawktu za zela sawmnga (50%) aia tlem lo chu ramchhung mi an ruai dawn a ni. Tarlan danin an inbunna tur senso hi cheng vbc. 2.5 vel a ni a, kum 2026 kumtir lamah hna thawk tan tura inbunfel hman an tum thu an sawi. 

MoU sign-na hunah hian Opikpure Pvt.Ltd. Managing Director chuan an ruahmanna thenkhatte tarlangin, ni zung chakna hmanga Sawhthing phorona tur khawl engemaw zat an hman tur thu a sawi a. Khuangleng-a Ginger Processing Plant bun an tum ah hian nikhat ah Sawhthing Metric Ton 20 an tih ro theih tur thu a sawi a. Organic Product, thlai hlo mihring hriselna atan a pawi thei tel lova tharchhuahte chu man man zawka hralh thin a nih avangin he hmalakna hian kuthnathawktute hnenah Organic farming uar zawka kalpuina a thlen an beisei thu a sawi a. Chutianga tharchhuah thlai te chu Organic Certification an buaipui sak tur thu leh Sawhthing chauh ni lo, thei leh thlai dangte pawh sawngbawl tel an tum thu a sawi a. He hmalakna hian thalaite tan eizawnna a siam belh bakah thlai tharte man man zawk a tihralna a thlen phah an beisei thu an sawi bawk a ni.