Cheng vbc 3.22 sen hnuah kum 12 chuang State Museum hman theih lohin a la awm

Art & Culture Department hnuaia ‘Mizoram State Museum’ tur sak thar chu cheng vbc. 3.22 sen anih hnuah pawh kum 12 chuang hman theih lohin ala awm.

August ni 27,2025-a Mizoram Legislative Assembly-a pharh tak Comptroller and Auditor General of India report in a tsrlan danin Aizawl MINECO-a Mizoram State Museum thar sakna atan hian cheng vbc 3.62 ruahman a niin cheng vbc. 3 hi Ministry of Culture atanga hmuh a niin vbc. 0.62 chu Mizoram State tum tur a ni a. March 2006 khan sawrkar laipui chuan cheng vbc. 3 hi a rawn pe chhuak (sanction) a. Mizoram State PWD chuan In sa tur hian F. Lalmalsawma, Tuikual South chu Tender hmanga thlangin In sakna atan hian cheng vbc 3.22-in inremna siam a ni a. September 2007 khan hna hi tan niin October 2012-ah zawhfel a ni a, mahse PWD hian kum 6 hnu, July 2019-ah Art & Culture Department kutah an hlan ta chauh a ni. Building hi sak zawh ni mahse Museum a awm tur Show Case, Galleries, Electric leh bungrua a awm lo a, hei vang hian Museum hi hman theih a ni rih lo a ni.

Museum hi a tirah Berawtlang-ah sak tum a ni a, mahse a hnuah MINECO lamah sawn leh niin Museum sakna atan hian Ministry of Culture chuan tum thum pawisa hi a pechhuak a, March ni 2,2006 khan a tum khatna atan cheng vbc. 1.93 pein March ni 28,2006 khan cheng vbc. 0.32 chu a tum hnihna atan pek chhuah leh a ni a. Pawisa pek tum thumna turin March ni 28, 2016 khan cheng vbc. 0.50 leh June ni 28,2017-ah cheng vbc. 0.25 pekchhuah a ni a.

UD&PA Department hnuaia Aizawl Smart City Limited sum cheng vbc. 3.92 hmangin building hi chei that leh a niin Gallery, Ceiling, kangmei laka invenna, Chhuat phah, Kawngkhar, Tukverh, Air Conditioner leh a dangte cheithat a ni a. A cheithat hna thawk tur hian M/s Zamzo Engineering Construction and Consultancy, Aizawl te thlan an niin March ni 31,2024-ah an hna hi zo tura tih an niin huntiam chhung hian zawh hman a ni lo thung a ni.

Hetihlai hian May ni 1,2024-a Art & Culture Department Director in a sawi danin Museum-ah hian bungrua (furniture), Eng, Electric, Air Conditioner leh bungraw dang te chu rukbo a ni tih a sawi a. Museum sak zawh hun tur kum 2012 tih chu tihsual palh (typing mistake) a niin kum 2019 tih zawk tur anih thu te, hna zawh har anih chhan pawh Ministry of Culture in pawisa (Third installment) a rawn pek tlai vang niin a sawi bawk.

Museum tur hi ruahmanna tha (improper planning) a awm loh avangin cheng vbc. 3.22 hmangin sak ni mah se a chhung cheina a awm loh avangin cheng vbc. 3.92 senbelh a ngaih phah bakah kum 12 chuang hman theih lohin a awm phah niin Comptroller and Auditor General of India report chuan a tarlang a ni.