GST Dan thar hman hnua bungraw man bithliah zawm lo te chungchangah hmalak a ni

Sawrkai laipuiin September 22, 2025 atanga GST Dan thar a hman hnuah he Dan hnuaia bungraw hralhna man tur a bithliah zawm lo an awm avanga Taxation Department chuan complaint 15 dawng tawhin GST rate thar anga thilman hniam tura ngaih, hniam si lote chu hriattir zel turin an chah bawk.

Taxation Department hotute sawi danin, September 22, 2025 atanga sawrkar laipui in Goods & Services Tax (GST) thar a ruahman chu hman a nih tak avangin hma an la mek a, September 22, 2025 atanga GST Rate thar hman anih dawn avangin hemi hmalam hian Taxation Officer te chuan sumdawng te hnen atangin GST Rate hniam hmaa bungrua an zawrhna man (wholesale leh retail) an zirchian hnuah Mizoram chhunga dawr hrang hrang an tlawh kual a, GST 2.0 hnuaia GST rate thar hman tur bawhzuiin Market Survey neih a ni a, Mizoram-ah pawh GST hniamna bungruate chu man hniama zuar turin an hriattir a ni. Hemi bawhzuina kal zelah hian Taxation Department-te hian Quik Reponse Team insiamin hma an la a, GST dan thar hnuaia bungraw hralhna man tura bithliah zawm lo complaint 15 dawng tawhin heng complaint an dawn bawhzuiin nimin khan Taxation lam chuan endik hna an thawk nghal a, GST Rate tlakhniamna bungraw man ti tlawm lo te chu Dan angin an chawitir zel dawn tih Taxation hotute chuan an sawi a ni.

Commissioner of State Tax chuan Central Sawrkarin GST a tihhniam chu September 22, 2025 atangin India ram pumah hman tur a nih vangin GST registration nei sumdawngte chu GST rate hniamna bungrua an zawrhte a man (rate) tihniam turin a hriattir a. GST rate thar anga thil man hniam tura ngaih, hniam si lote chu Phone No. 0389-2336167 bakah Mobile Phone No. 8415065109 leh 9862581640-ah hriattir tura ngen an ni a, Taxation Department Office hrang hrangah te pawh complaint thehluh theih a ni.

Sawrkar laipuiin GST chhiah a tihhniamna, GST 2.0 tun thla ni 22 atang khan rampum rualin Mizoram-ah pawh a taka hman tan a ni a, thil leitu mipuite chuan GST rate thar hi an chhawr tangkai hle dawna an hriat thu sawiin, thilman tam tak chu a tlakhniam phah a ni.