October 30, 2025 atangin Aizawl khawpui kawng siamthat hna tan a ni dawn

PWD Minister Vanlalhlana chuan October 30, 2025 atangin Aizawl khawpui kawng siam that hna tan a ni dawn tih sawiin, Aizawl leh Lunglei inkar kawng pawh hma an lak zui nghal tur thu a sawi bawk.

Nimin khan ZPM chuan Aizawl-a an Office-ah Chhung Inkhawm neiin he hunah hian PWD Minister Vanlalhlana chuan hun rei tak Aizawl khawpui kawng Major repair ni tawh lo chu tha takin an siam dawn tih sawiin, “Tuna Bawngkawn kawng tha tak kan hmuh ang hian siam vek kan tum. Oct.30, 2025-ah hna tan a ni dawn a, Hot Plant hmun hnih PTC Lungverh leh Lengpui-ah din a ni a, kawngpui pawimawh laia hman tur phei chu Silchar lung tha lakluh kan tum. Bituminous Concrete a ni a ni dawn a, Aizawl to Lunglei road pawh kan ngai pawimawh a, kan thawk chhumzawm ang,” a ti.

PWD hna ber chu kawng siam leh enkawl bakah sawrkar building sak leh enkawl te a nih thu PWD Minister chuan sawiin, “Mizoram-ah State PWD-in National Highway km 690.97 kan enkawl a, State Highway km 252 kan enkawl bawk a. Aizawl khawpui kawng (motor kal theihna chin) km 383, District kawng km 1022, MDR km 834, ODR km 848, Village Road km 1703, PMGY laih kawng km 936 te awmin, Mizoram a kawng kan neih chu a vaiin km 6610 a ni,” a ti a. Heng bakah hian BRO enkawl kawng km 915 a awm bawk thu leh PMGSY avangin Mizoram in kawng kan neih belh nasat thu a sawi a, chuti chung chuan India ram Road Density atanga chhutin kan la nei tha tawk lo hle tih pawh sawiin, “Mizoram hi square kilometre 100-ah 46.37 km kan nei a, National Level-ah chuan 116 km a ni thung,” a ti bawk.

PWD Minister chuan Vairengte atanga Sairang inkar kawng chu NHIDCL-in a enkawl tih pawh sawi lehin, “Chutiang chu ni mah se Kolasib leh Kawnpui inkar leh Khamrang leh Sairang inkar kawng te Mizoram sawrkarin contractor-te ruaia hna a thawh mek lai a ni a, NHIDCL-in heng kawng siam hna hi la mah se a laklawh lai kawng siam hna kan kalpui reng tho a ni. Laih zawh a nih hnuah NHIDCL-in an enkawl zui ta mai si lova, enkawltu nei lo ang main a awm hman ta a. Furpui a lo thleng a, kawng a chhe chho zel a, harsatna kan tawk ta a ni,” a ti a. Kawng tha siam turin khaw tha an mamawh thu pawh PWD Minister chuan sawiin, “Hei hi kan harsatna leh buaina lian ber niin Thal hun kan thleng chho ang a, kan kawng te pawh a tha chho tawh turah ka ngai. Cheng nuai 137.87 kan sengral tawh a, tunah hian cheng nuai 100 kan dil belh leh mek a, Kawnpui leh Khamrang inkar leh Khamrang leh Sairang inkar kawng siam tha vek tur chuan cheng nuai 500 kan mamawhin kan hria,” a ti bawk.