HPC leh MDF te RUPP atangin paih an ni

Election Commission of India (ECI)-in ram pum huap leh State hrang hranga Registered Unrecognised Political Parties (RUPP) a thenfai mek zingah Mizoram a mi 2 an tel ve.

RUPP te hi ECI-in political party a a pawmpui la ni lo, mahse inziaklut site an ni a. Election Commission-in kar kalta mai khan RUPP 474 zet chu a paih tawh a. Hemi zingah hian Mizoram Political party zinga Election Commission a inziaklut 2 - Hmar People's Convention (HPC) leh Maraland Democratic Front (MDF) te chu paih zingah an tel a. HPC hi la ding reng mah se inthlanna-ah an party hminga chuh lovin party dang nena thawkho in HPC candidate te chu independent angin kum rei tak an lo ding tawh a, inthlanna a an party hminga an chuh loh rei avangin paih a ni a. MDF hi awmze nei a inthlan a hmachhawn ngai lohna a rei tawh bawk avangin paih a ni bawk. Hetihlai hian an party mal hminga inthlanna chu khat tak, People's Conference (PC) party erawh chu kum 2024 a Lok Sabha inthlanpui a candidate an neih ve leh zauh avang khan an la him rih ni a hriat a ni.

ECI chuan Representation of the People Act 1951 tlawhchhanin an tihtur pawimawh ber inthlanna kum 6 chhung chuh tawh lo Registered Unrecognised political party-te chu a thianfai mek a. Kar kalta Ningani (September ni 18) khan RUPP 474 a paih bakah hian a hma-in RUPP 334 chu August ni 9 khan a lo paih tawh bawk a ni. 

Hei bakah hian State 23-a political party 359-te chu inthlanna chuh mah se an sum hman dan tangka kum 3 chhung zet ECI-a an thehluh tawh loh avangin paih theih dinhmunah an ding mek a. ECI chuan he'ng Political party-te awmna State a Chief Electoral Officer (CEO)-te chu an dinhmun thlithlai turin a hriattir tawh hlawm a ni.