Sawrkar quarters-a cheng te chhuak turin ti

Mizoram sawrkar chuan Aizawl Ainawn Veng-a sawrkar Quarters a chengte chu huntiam ralhma ngeia Quarters chhuahsan theuh turin a hriattir.

September ni 18, 25-a sawrkar in thupek a chhuah angin, Mizoram sawrkar hnuaia General Administration Department (GAD) chuan Ainawn Veng-a sawrkar Quarters a chengte'n Quarters an chhuahsan hun tur chu Order No.D.11014/3/2025-ESTT-GAD dt. 08.07.2025 hmangin a lo tarlang tawh a. Quarters luahtute'n chenna tur In dang an zawnna tur hun tam zawk pek a tul nia a lan avangin Adviser to Chief Minister (Finance and Planning) hova Local Council leh NGO zawng zawngte'n August 6, 2025-a thu an rel angin, Ainawn Veng-a sawrkar quarters luahtute'n an quarters luahlai theuh an chhuahsan hun tur ruahman that leh a ni a. Huntiam ralhma ngeia quarters chhuahsan theuh turin quarters luahtu zawng zawngte hriattir an ni. 

Hetianga quarters luahtu te chhuak tura hriattir an nih nachhan hi an quarters luah a him tawk tawh loh vang nia thudawn a ni a. Mizoram sawrkar-a GAD in ruahmanna a siam dan chuan, Zone-I (Salvation Army Church bul) a awm te October ni 31, 2025 hma a chhuak tura tih an ni a, Zone-II (Ainawn Presbyterian Church hnung) te pawh October ni 31, 2025 a chhuak tura tih an ni bawk. Zone-III (FMGE&W Enclave road) te November ni 30, 2025 hma a chhuak tur a tih an ni a, Zone- IV (Jeremy Lalrinnunga In bul) te October ni 31, 2025 hun tiam sak an ni. Zone-V (Type III tlang) te chu January ni 31, 2026 tiam sak ni bawkin, Zone-VI (Shiv Mandir thlang) te chu November ni 30, 2025 hun tiam sak an ni a, Zone-VII (Type-IV block) te pawh January ni 31, 2026 hun tiam sak an ni bawk.