Nakum January thla ah Dialysis khawl hman theih beisei a ni

District Hospital Serchhip-a Dialysis khawl bun thar chu nakum (2026) January thla ah function theih beisei a ni.
Zirtawpni kaltaa Serchhip-a rawn kal Bialtu MLA leh Chief Minister Lalduhoma hnenah ZPM Serchhip Block hruaitute chuan Serchhip mamawh hrang hrangte an lo thlen a, heng zingah hian District Hospital Serchhip-a Dialysis khawl bun tawh chu a function thuai theihna tura hma lak sak tura ngenin, Chief Minister hian Department hotute a be nghal a, he khawl hmang thei tur hian Doctor awmsa pakhat chu thla thum (3) vel training a ngaih ve thu leh chumi chhung chuan Technician leh thawktu dang lak hman tum a nih thu an lo hrilh a, hetiang hi a dinhmun a nih avangin nakum (2026) January thla ah a function theih beisei a nih thu an sawi a ni. Hei bakah hian Serchhip Damdawi In-a Doctor indaihlohna pawh lo thlen lehin Medicine Doctor chu tun thla chhung ngeia pek theih beisei a nih thu an sawi a. Nursing School function thuai tura an lo thlen chu Tender tihfel tep a nih thu Chief Minister hian a sawi bawk.

Heng bakah hian Chief Minister chuan Serchhip-a District Education Officer (DEO) awm lo chungchang ah an rawn dah thuai tur thu a sawi a, Serchhip Sports Complex-a Football Ground (pitch) Turf tizau tura ngenna chu a bawhzui nghal tur thu a sawi a. Govt. Serchhip College Campus-a kawngpui kaltlang thlakna tura a helna kawng siam turah sum dah fel tawh a nih thu sawiin, Mat lui khuahna tur atan cheng vbc. 177 Estimate a nih thu leh Brahmaputra Board chu thawktu tur an nih thu a sawi a. Bukpui-a ITI Building chu a function theih tura hmalak chhoh mek zel a nih thu a sawi bawk a. New Serchhip Thlanmual min vanga sawn ngai chu a panna kawng leh a hmunhma siamremna atan cheng nuai 10 rawn pek a tum tur thu a sawi bawk.