US Consul General-in Mizoram a rawn tlawh

Mizoram tlawha lo zin US Consul General, Kathy Hiles Diaz, Kolkata leh a thawhpui ten nizan hmasa khan Chief Minister Lalduhoma hmuin hmasawnna tur hrang hrang an sawidun.

He an inkawmna ah hian Chief Minister chuan Mizoram a rawn tlawh avanga lawmthu lo hrilhin hun nuam tak hmang turin duhsakna a hlan a, investment lama Mizoram tanpui a inhuamna ah lawmthu hrilhin Foreign Funding hmalakna lam chi reng reng chu Central sawrkar remtihna hnuaia kalpui vek a nih thu a hrilh a. Mizo hnahthlak US a cheng an tam thu sawiin, Mizoram mipuite zingah US tlawh duh an tam zel avangin inpawh taka an thawhho a pawimawh thu a sawi.

He hunah hian Kathy Giles Diaz-i chuan Mizoram chu mawi a tih thu leh rawn tlawh a chak thin thu sawiin, US-ah Mizo hnahthlak tam tak an awm tih a sawi a, an awmna hmunah khua leh tui tha an ni zel tih a sawi a. Mizoram-ah US Company te tana Investment kalpui theihna chi a awm a nih chuan a tul anga tanpui a inhuam thu a sawi bawk.

US Consul General hian nimin khan Central YMA Office pawh tlawhin Central YMA hruaitute nen an inkawm a, Central YMA President Lalhmachhuana chuan US Consul General Kathy Giles Diaz-i’n YMA ngaipawimawha a rawn tlawh chu lawmawm a tih thu sawiin, YMA leh Consul Office te thawhhona tha tak an neih thu leh hun hma lamah Consul General lo ni tawh leh Ambassador te pawhin Central YMA hruaitu te kawma Central YMA Office an tlawh tawh thu te a sawi a. Consul General chu India rama a awm chhunga Mizoram lo tlawh leh tur leh India - Myanmar ramri te tlawh ve turin a sawm bawk. Hei bakah hian Central YMA hruaitute hian Mizo thalaite tana engemaw tal ruahmanna siamsak dan kawng zawn sak turin an ngen a. YMA in raltlan a lo buaipui dan te an sawipui bawk.