ASUTP hnuaia Aizawl-a hmalak dan tur sawiho

Aizawl khawpui a lo nawm zawk theih nan leh Traffic jam nasa thinte a lo ziaawm zawk theih nana hmalak dan tura ruahmanna sawihona leh inhrilhhriatna hun chu nimin khan neih a ni.

Aizawl-a Vaivakawn Auditorium-a Aizawl Sustainable Urban Transport Project (ASUTP) hnuaia hmalakna leh Temple Square leh Vaivakawn inkar kawng thawmthatna tura ruahmannate sawihona leh inhrilhhriatna hun, ‘Sensitization Meeting on Corridor & Junction Improvement Project under ASUTP’ ah hian UD&PA Department changtu Minister K. Sapdanga chuan Aizawl Sustainable Urban Transport Project-in a tum ber chu, Aizawl khawpui a lo nawm zawk theih nan leh traffic jam nasa thinte a lo ziaawm zawk theih nana kawng tihzauh belh te, mipuite him taka an chet vel theih nana kalna nuam, Footpath tha leh changkang zawk siamte a nih thu a sawi a. Tun dinhmunah ASUTP hnuaiah hian Temple leh Vaivakawn inkar kawng bakah Bawngkawn leh Kulikawn inkar kawngte thawmthatna tura ruahmanna siam mek a nih thu sawiin, ruahmannate a hlawhtlin thuai theih nan khawtlang hruaitute chu theihtawp lo chhuah ve tur te, kawngpui ti hnawk zawnga lirthei dah thinte vil uluk lehzual turte in a ngen bawk.

He hunah hian Aizawl West-II bialtu MLA leh Sports Minister Lalnghinglova Hmar pawhin he Project hi mipuite ta, mipuite that tlanna tur a nih avangin thawhhona tha a pawimawh tur thu a sawi a, veng mipuiten theihtawp chhuaha an tawiawm zel a beisei thu a sawi bawk.

Nimin-a he hun hman hi UD&PA Secretary Lalmalsawma Pachuau kaihruaiin UD&PA leh PWD Department hotute bakah Tuikual, Dinthar, Dawrpui Vengthar leh Vaivakawn khawtlang hruaitute an tel a. ASUTP buaipui tura sawrkarin a rawih, Mott Macdonald Consultancy atangin Manish Rege, Team Leader, Project Planning, Design & Management Consultant leh HVL. Zarzoenga, Programme Coordinator ten powerpoint hmangin Temple Square leh Vaivakawn inkar kawng (1.87km) tih hmasawnna tura ruahmanna te an tarlang a. Ruahmanna an siam dan chuan he hmalakna ah hian Dawrpui Vengthar kawng pengthuam tihzauh (Junction Improvement) te; Temple leh Vaivkawn inkar ke-a kalna kawng thawmthat (Foothpath & Walkway Marking) te; Step 22 awmte thawmthat (Improvement of Staircases) te; Parking Zones leh Bus dinna changtlung zawka siam leh Retaining wall thawmthat ngaite thawmthat te a tel a. Khawtlang hruaitute duhdan leh ngaihdante ngaihthlak niin ruahmanna (DPR) siamna ah an telve theih nan kawng hawn sak a ni bawk.

Hemi hnu hnu hian UD&PA Minister leh SYS Minister-te hian Vaivakawn (Chuanhnuai) leh Hunthar Veng inkar kawng, Fire & Emergency Services Headquarters bula chhuak chu mipui tam zawk ten tangkai zawka an hman theih nana hmalak dan tur an en nghal bawk.