MyBharat portal-a thalai tam zawk an inziahluh theih dan tur chungchang sawihona neih a ni

Sports & Youth Services Department changtu Minister Lalnghinglova Hmar hovin a Pisa-ah Ministry of Youth Affairs and Sports hnuaia MyBharat portal leh thalai kaihhnawih portal danga thalai tam zawk ziahluh dan tur chungchang sawihona niminpiah khan neih a ni.

He sawihona hunah hian Sports Minister chuan sawrkar laipuiin Portal kaltlangin thalaite tana Scheme pawimawh leh tangkai tak tak a puanzar thin thu sawiin, MyBharat chauh ni lo, thalai kaihhnawih hmalakna hrang hrangah kan tel ve zel a tul a, Mizo thalaite an inziahluh tam tawk loh avangin heng portal kaltlanga hamthatna awm thei te an chân phah thin thu sawiin, “Tunlai khawvelah chuan kan hnathawh leh hmalakna tam tak hi ‘data’ hmanga teh kan ni tawh a. Field level-a kan hnathawhte a tarlanna tur portal-ah kan report loh chuan thawk tha lo angin kan lan phah thei,” tiin, sawrkar hmalakna hrang hrangte a report na tur dika report a pawimawh thu a tarlang a ni.

He hunah hian S&YS Department hnuaia thalai kaihhnawih khawihtu Neva Yuva Kendra (Mera Yuva Bharat), National Service Scheme (NSS) leh National Cadet Corps (NCC) aiawh te’n Bharat Portal-a registration drive an kalpui dan leh mi tam zawk an in register theih nana rawtna an neihte an tarlang a. MyBharat portal registration drive hi kumhnih vel kalpui tawh niin khaw hrang hrangah YMA leh YLA te nen thawkhoa thalai kokhawmin a hmuna registration tih (on-the-spot registration) kalpui thin a nih thu tarlan a ni a. Zirna In, a bikin NSS Unit awmna College leh School-ah te Mass Registration Drive kalpui mek niin Registration beihpui hi October ni 15 thleng tur niin tun dinhmunah Mizoram atangin mi 40,000 vel an in register tawh a ni.

MyBharat portal-ah hian thalai kum 15 - 29 a in register theih a, College/University, NGO, Youth Club, MSME leh Business dangte pawh ‘Partner’ anga in register theih a ni a. Portal kaltlang hian sawrkar Scheme leh programme hrang hrang, Internship leh Fellowship tih theihna te puanzar thin niin, Portal kaltlang vek hian dilna pawh thehluh thin a ni a. Training leh Certificate Course hrang hrang, Career Guidance thlengin portal-ah hian a awm a, hei hian zirna leh hna zawnnaah thalaite nasa takin a pui thei a ni.