Serchhip-ah thubuai lian ngaihtuah theihna tur Addl. District & Sessions Judge Circuit Court hawn a ni

Serchhip Bialtu MLA leh Chief Minister Lalduhoma chuan nimin khan Serchhip District Court-ah Additional District & Sessions Judge Circuit Court a hawng a, Circuit Court hi thubuai lian zawk ngaihtuah thei Addl. District & Sessions Judge te Serchhip-a a khat tawka an thut theihna tur hmun a ni.

Chief Minister Lalduhoma hian nimin chawhnu khan Serchhip District Court-a Additional District & Sessions Judge Circuit Court hi hawngin hemi puala inkhawm Serchhip District Court tual-a neih ah Serchhip in Additional District & Session Judge Circuit Court a neih thar chu thubuai lian zawk rel theihna Court a nih thu leh a khat mawi tawkin Serchhip-ah Addl. District & Session Judge a rawn thu ve thin tawh dawn tihna a ni tih sawiin, Court sang zawk chhawp hnaihna (Accessible); Rang zawka Court rorelna (Efficiency) leh Thubuai hmanhmawh bik tana insawrbingna (Specialised Justice) atan te a tangkai dawn thu a sawi a. Kan ramah ruihhlo a hluar thu leh ngawlvei pawh kan pun thu sawiin, “Hei hian thil tha lo dang tam tak a keng tel. Thubuai ngaihtuah tur a pung ve zel a, case pawh a lian tual tual emaw tih theih a ni. Serchhip District phei chu ram laili a awm, a ruka sumdawngten an paltlan nasat a ni a. Kan Police leh Excise lam te pawhin an man nasa thin a. Court sang zawk hi an mamawh zing tual tual a. Serchhip District-ah POCSO case kan ngah hle bawk a. Dan bawhchhetute hremna lamah leh mipuite zirtir kawngah hian hmalak uar a tul hle,” tiin “Kalphung thar, mipui sawrkar tiin kan kal dan kan sawi thin a. Circuit Court hi Court sang zawkin mi harsa zawkte a va panna, an ban phak maia a va inchhawp hnaihna a ni. He Circuit Court hian mipui huapzo rorelna tungding turin nasa takin min thawhpui tihna a ni,” a ti.

Chief Minister chuan Serchhip District Court hi kum 2009-ah kalpui tan niin Judicial Magistrate First Class in thutchilhin, DC Office-a Room pakhat luaha bultan a nih thu a sawi a, kum 2014-ah Chief Judicial Magistrate dah tanin kum 2016-ah mahni Building luahin kalpui tan a nih leh thu sawiin, “November ni 25, 2024 khan Circuit Court dinna tur hi sawrkar chuan Notification a tichhuak a, Additional District & Sessions Judge II, Aizawl chu Serchhip hmui tura tih a ni. Hun engngemaw chen an han tichhin a, Staff lam tlakchham vang te, Court Room mumal tak a la awm loh avangte in chawlhsan leh rih a ni a. Kumin June thla atang khan Video Conferencing in kalpui a ni leh ta,” tiin tuna Circuit Court hawn a nih takah hian kawng hrang hrangah mipuite tan awlsamna a thlen dawn thu a sawi bawk a ni.

Serchhip-a Additional District & Session Judge Circuit Court hawnna hunah hian Gauhati High Court-a Judge, Justice Marli Vankung chu Khual zahawm niin Serchhip-a Circuit Court hawng tur hian nikum lamah Sub-Hqrs. YMA Serchhip ten Home Minister hnenah an lo thlen tawh thu leh hemi bawhzuia hmalak chhoh dan leh an bawhzui dan tlangpui te sawiin, tunah chuan Serchhip-ah thubuai lian zawk te pawh ngaih-tuah theih a nih tawh dawn thu te a sawi a. Nikum October thla atanga Video Conferencing hmanga thubuai ngaihtuah thin chu Serchhip-ah ngei Judge rawn kalin ngaihtuah a nih tawh dawn thu leh Serchhip District tan Mellung pawimawh tak a nih thu te pawh a sawi bawk a ni.

Nimin-a hawn tak Additional District & Sessions Judge Circuit Court-ah hian Additional District & Sessions Judge-II, Aizawl ni mek Julie Lalrinzami chu rawn thu tura ruahman a ni a, thawktu dang dah belh awm lovin Serchhip District Court-a thawk ten a tul anga an puih dawn bakah Aizawl lam atangin Staff te pawh a rawn hruai thin dawn a ni.

Serchhip-a Addl. District & Sessions Judge Circuit Court hawnna hunah hian sawmbik thahnem tak telin Serchhip CJM Lalrochami Ralte chuan lawmthu sawiin hun a hmang bawk.