Rashtriya Poshan Maah pualin kawngzawh neih a ni

Rashtriya Poshan Maah vawi 8-na hman mek ah nimin khan Serchhip-ah ‘2000 Steps a day challenge Rally’ neih a ni.
Women & Child Development Department-a District Programme Office leh Serchhip ICDS Project te tangkawp in an buatsaih he Rally hi Serchhip AOC Veng atanga Serchhip Bazar thleng neih niin he Rally-ah hian DCPU, OSC, Shakti Sadan, CDPO, Serchhip ICDS Project Office-a thawk te leh Anganwadi Workers leh Helper te an tel a. Kawngzawh tan hma hian Serchhip AOC Tual-a hun tawite hman niin he hunah hian Serchhip ICDS Project-a CDPO Caryl Lalpari chuan taksa insawizawi a pawimawh thu leh kan insawizawi tlem thu sawiin, ei leh in tha ringawt ni lovin taksa kan insawizawi ve thin a tul thu a sawi a. Kan thil ei ah pawh thau, mawm leh al ei tlem a tul thu leh Phone kan en nasa lutuk pawh kan taksa leh rilru tana a that loh theih thu a sawi bawk.

He hunah hian Poshan Abhiyaan-a District Coordinator James Lalremliana chuan he hun an hman chhan te sawiin, ani kaihhruaina hnuaiah hian he kawngzawh a tel te hian hriselna atana hma la tura Intiamna thutiam ‘Pledge’ an sawirual a. Hemi hnu hian Bazar pan-a kawng zawhin Ser-chhip Bazar thlengin kawng an zawh a ni.

Kawngzawh neih zawh a nih hnu hian Signature Campaign neih chhunzawm nghal a ni a, hriselna vawng tha tura ei leh in fimkhur tur leh taksa sawizawi-a midangte zirtir tura intiamin hming an ziak nghal a ni.