Lenkawl

Ramchhung hmundangte rualin nimin khan Serchhip DC Office-a thawktute pawhin Martyr’s Day chu urhsun takin an hmang. India Zalenna atana nunna hlantute hriatrengna ni, Martyr’s Day pual hian Serchhip DC Meeting Hall-ah SDO (Sadar) Lalzikpuii hoin hun hman a ni a, he hunah hian DC Office-a thawktu zawng zawng te chu India Zalenna atana nunna hlantute hriatrengna leh zahna entir nan ngawi rengin minute hnih (2) an ding a ni. Serchhip-a sawrkar Pisa dangah te pawh Martyr’s Day hi hman a ni bawk.

Mizoram tlawha rawn zin mek Ministry of Defence hnuaia National Defence College, New Delhi-a training lai sipai hotulu te leh faculty te chuan nimin khan Serchhip District rawn tlawhin Thenzawl-a Golf Course & Resort-ah Addl. DC Lalmuansanga Ralte leh SP Stephen Lalrinawma hovin sawrkar mi pawimawh ten an lo dawngsawng.

Mizoram sawrkar chuan nimin khan Mizoram-a MCS Officer thenkhat te awmna hmun siksawi turin thuchhuah a siam a, hemi ang hian Serchhip DC Office-a SDC leh DLAO mawh-phurhna la mektu F. Lalnisai chu Champhai-ah BDO hna leh SDC hna chelh tura sawn a ni a, a aiawh tur hi dah awm rih lovin DLAO hna hi SDO (Sadar) Lalzikpuii chuan a chelh lailawk rih dawn a ni.

ZPM Party chuan nimin khan Aizawl-a an Office-ah Chhung Inkhawm neiin he huna thu sawitu ZPM Consultant W. Chhuanawma chuan Party pahnihten State kan nih hnuah kum 35 min kaihruai tawh tih sawiin, ram chawikanna tur leh hmasawnna tura an tih theih tawk kan hre tawh niin a sawi a. “Mizoram-ah hian sawrkar lai ninna (anti-incumbency wave) avangin sawrkar lai thlak a ni thin a, tunah erawh sawrkar tha duh tak takna avangin thlak a ni dawn a, chutiang tur chuan ram mipuite kan insingsa mek a ni,” tiin ram mipui tam berte innghahna leh beisei awmchhun an ni mek niin a sawi bawk.

Mizoram Pradesh Congress Committee (MPCC) President Lalsawta chuan Mizo hnam tel lohna India a kim thei lo nia sawiin, “India Pakhat, Mizoram mipuite telna hi kan duh a ni,” a ti.

PC Party chuan Zoramthanga kaihhruai MNF sawrkarna huanga Mizoram hmun hrang hranga Zu leh Damdawi ruihhlo/Drugs a hluar chho ta hle mai chu pawi an tih thu thuchhuah siama tarlangin, ni tin deuhthaw, a bikin damdawi tawlhruk man chhuah thàwm hriat tur a awm deuh reng mai te, dan lo a Zu zawrhna hmunpui suasam leh thahnem tak man chhuah a ni reng mai te chuan dan leh thupek kenkawhna kawnga Mizoram sawrkar hlawhchham zia a tilang chiang hle niin an tarlang bawk.

Tun thla ni 8-a Mizoram Legislative Assembly Deputy Speaker thlanna neih tura MNF Legislature Party in Candidate atana an thlen Lawngtlai East bialtu MLA, H. Biakzauva chuan nimin khan he inthlanna chuh tur hian Assembly Commissioner Lalhmahruaia Zote hnenah Nomination Paper a thehlut a. Deputy Speaker atan hian H. Biakzauva hi East Tuipui bialtu MLA Ramthanmawia'n a nominate a, Lengteng bialtu MLA, Dr. L Thangmawia chuan a thlawp bawk a ni.

Lawngtlai khawpui chhunga bawlhhlawh tawih thei lo chi sawngbawl leh thliarhran kawnga hmalak dan tur hrang hrang nimin khan Lawngtlai Bawrhsap Amol Srivastava-a hovin DC Conference Hall-ah sawiho a ni a, Bawlhhlawh thliar-hran chu faina kawnga Lawngtlai khawpui mu tan ber a la nih avangin hmasawn theih dan tur hrang hrangte he hunah hian sawiho a ni. Nimin vek khan Kolasib-ah pawh bawlhhlawh thliar hranna chak zawk a kalpui leh vawikhawt hman plastic tihrem dan tur chungchanga hmalak dan tur ngaihtuah a ni bawk a, Rengtetlang a bawlh-hlawh paihna hmun chu ram leilung tan a hrisel zawk nan thla 4 ralhmaa hmang chhunzawm tawh loh tur a thupek a awm thu tarlan a ni.

Nimin January ni 30, 2023 kha India Zalenna atana nunna hlantute hriatrengna ni, Martyr’s Day a nih angin Sawrkar Department leh Pisa hotulu ten Martyr te hriatreng nan ngawi renga dingin hun an hmang a. Mizoram-a Sawrkar hmunpui lian ber, MINECO-ah chuan Chief Secretary Dr. Renu Sharma hovin chawhma dar 11:00 khan India Zalenna atana nunna hlantute hriatrengna atan hun hman a ni.

State Bank of India (SBI) Mamit Branch in Corporate Social Responsibility (CSR) Fund atanga Mamit District chhunga Anganwadi Centre 15 te hman tura Smart TV an pek chu nimin khan Mamit Bawrhsap Lalnunhlua chuan Anganwadi te kutah a hlan a, Bawrhsap chuan naupangte chu kan ram hmakhua an nih avangin an hmakhua kan ngaih pawimawh a tul tih sawiin, ei leh in tha bakah rilru hrisel an neih theihnan hun leh hmun siam sak an tul thu a sawi bawk. Heng TV hi Mamit khawpui chhung Angan-wadi Centre 10 bakah Zawlnuam, W. Phaileng leh Reiek ICDS hnuaia Anganwadi Centre panga ah te pek an ni leh dawn a ni. 

Khawvel-a Salvation Army hotulu ber, General Brian Peddle-a leh a nupui World Women’s Ministry President, Commissioner Rosalie Peddle-i te chuan khan Mizoram an rawn thleng a; naktuk February ni 1 atanga ni 5 chhunga India Eastern Territorial Congress neih tur an hmanpui ang.

Vawiin atanga Parliament Budget Session neih tur chungchang ah nimin khan Parliament Library Committee Room-ah All Party Leaders MP te an thukhawm. Defence Minister Rajnath Singh hova nimin a thutkhawm ah hian Mizoram Rajya Sabha MP K.Vanlalvena chuan Mizoram-ah Myanmar atanga raltlan mi engemaw zat enkawl mek an nih thu leh Bangladesh atanga raltlan lo lut tur te erawh ramri-ah BSF ten an lo dan kir thin avangin mi tam zawkte chu an kir leh thu a sawi a. Mizo hnahthlak ralthuam kengte leh Bangladesh Army te chu nimin ah pawh khaw pakhatah nilenga an la inkah thu sawiin, Civil mite chu anmahni sahim nan Mizorama an lo luh phalsak ngei a tul thu leh Central sawrkar-in Bangladesh atanga ral tlante Mizorama lo luh phalna BSF hnenah a pek thuai a tul thu a sawi bawk.

MNF Legislature Party (MLP) chu nimin khan Chief Minister Zoramthanga hova thukhawmin Mizoram Legislative Assembly Deputy Speaker thlanna neih turah Candidate atan H. Biakzauva chu lungrual takin an thlang.

Mara thalai pawl lian ber, Mara Thyutlia Py (MTP) hruaitute chuan nimin khan Governor Hari Babu Kambhampati kawmin Siaha District chhunga mipui tana thil an ngaihpawimawh hrang hrangte bakah Refugee chungchang leh NHIDCL company hnathawh chungchang te an sawipui.

Dan lova Khuhva tawlhruk chungchang ngaihtuah tura din Task Group on Illegal Arecanut chu nimin khan Task Group Chairman H. Lalengmawia IAS, Commissioner & Secretary Home Department kaihhruaiin an thukhawm.

Governor Hari Babu Kambhampati chuan nimin khan Bharat Sanchar Nigam Ltd. (BSNL) leh Bharat Broadband Network Ltd. (BBNL) hotute kawmin Mizoram-a Internet Connectivity tih hmasawn dan tur chungchang a sawipui.

Kumin March ni 2-a Mizoram in G20 Meeting a thlen tur atana inpuahchahna kal mekah Chief Coordinator Harsh Vardhan Shringla leh a thawhpuite chuan Inrinni khan Chief Minister Zoramthanga chu CM Cabinet Meeting Room-ah hmuin an inkawm a. Mizoram G20 Core Team leh Sub-Committtee te Meeting am neihpui mghal bawk.

Nikum 2022 chhung khan Mizoram-ah kangmei avanga bungraw kangchhe hlut zawng chu cheng vbc. 23 a tling.

Vawiin January ni 30 hi India Zalenna atana nunna hlantute hriatrenga ni, Martyr’s Day a ni a. Kumtin rampumah chawhma dar 11:00 hian  anmahni hriatreng nan leh zahna lantir nan minute hnih chhung ngawi renga dingin hun hman anih bakah he hun chhung hian lirthei tlan mek pawh te tihdin an ni thin. GAD hriattirna angin Department leh Pisa hotulu te, DC zawng zawngte leh Zirna In hotulu te chu an hnuaia thawk leh zir te Vawiin chawhma dar 11:00 a urhsun taka he hun hi hmang tura hriattir an ni.

Tuikum bialtu MLA leh AH&Vety Minister Er. Lalrinawma chuan Inrinni khan a bial chhunga Thinglian khua tlawhin khawtlang hruaitute nen ranvulh lama Thinglian khua in hma a sawn theih dan tur an sawiho.

Inrinni zing dar 10:00 vel khan Serchhip IOC Veng-ah ruang pakhat chhar niin IOC Veng a cheng Rohmingthanga (Hmingtea) ruang a ni tih finfiah a nih hnuah nimin khan vuiliam a ni.

Mizo Zaimi Inzawmkhawm (MZI) Hqrs. Serchhip chuan Inrinni khan kum 2023-2025 chhunga an hruaitu tur thlanna MJA Serchhip District kaihhruain hnuaiah an nei a, President-ah Lalengliana Ralte (Vengchung), Vice President-ah Lalremruata Ralte (AOC Veng), Secretary-ah C. Zodinthara (Leisang Veng), Asst. Secretary-ah R. Lalmuansanga (Chhim Veng), Treasurer-ah F. Lalremruati (Darnam Veng) leh Fin. Secretary-ah Johny Lalhruaitluanga (Venglai) te thlan an ni.

Rampum huap zirlai naupangte Science thiamna lam phochhuahna hunpui, National Children’s Science Congress vawi 30-na neih mekah Mizoram-a zirlai naupang 8 an tel. National Children’s Science Congress hi Science City, Ahmedabad, Gujarat-ah Zirtawpni khan tan a ni a, hemi ni hian zing karah ramchhung hmun hrang hrang atanga kalkhawm zirlaite chu anmahni Hnam inchei dan theuha incheiin kawng an zawh a, hemi hnu hian zirlai naupangte chuan an thil zirbing te phochhuakin an sawifiah nghal bawk a ni. Science Teacher’s Association Mizoram (STAM) tirha kal Child Scientist pariat zingah hian Lalrinnungi Ralte d/o Rohluzuala, Marian H/S, Serchhip-a pawl 9 zirlai chu a tel a ni.

Lunglei District chhunga Tlabung leh a chhehvela nau pai zingah damdawi In-a piang aiin mahni in lama nau nei an la tam zawk a, nau piang za zela 71 vel zet chu In lama piang an ni. Tlabung-a Health department-a thawkten an chhinchhiah theih chinah, kum 2022 chhung khan Tlabung Sub-District Damdawi In-a hrin chhuah naupiang 136 an awm a, hetihlai hian In lama piang zat erawh chhinchhiah theih chinah 340 tlingin, a tam zawk chu Tlabung chhehvela awm hnamdang hmeichhia ten an hrin an ni. 

Champhai District Bawrhsap James Lal-rinchhana chuan Inrinni khan Champhai-a RD Pump, Ramhrangkawn-ah Pollution Testing Centre a hawng a, Transport Department chuan lirthei khu endikna khawl Smoke Emission Analyser Petrol Engine leh Diesel Engine pakhat ve ve leh Computer Set bakah khawl dangte chu anmahni kutah hian an hlan a ni.

Mizoram Legislative Assembly Deputy Speaker thlanna chu thla thar Februry 8 khian neih a ni dawn. Thla thar February 7 atanga Mizo-ram Legislative Assembly Budget Session neih tura hun hman dan tur Bussiness Advisory Committee-in an duan danah chuan Session tan ni hian House-ah Larsap in thu a sawi dawn a, a tuk February 8-ah Session neih kar laka MLA boralte sunna hun hmangin Deputy Speaker thlan a ni anga, February 13-ah Finance Minister in kum 2023-24 budget leh kum 2022-23 a sawrkar sum dil belhna Supplementary demand) te a pharh ang. Tun tum Session-ah hian Minister hrang hrangte kum 2023-24 sum hman tur pharhin pass tum a ni ang.

Bilkhawthlir Kuhva Chingtute chuan Inrinni khan Burma Kuhva thahnem tak an man. Dan lova kuhva tawlh titawp tura Duty Bilkhawthlir Kuhva Chingtute hian Tipper lian (Hyva) chu lo tidingin, Tipper chhuat hi siam danglam a ni tih hmuin an endik a, a chhungah hian a chhuat siam chawpin a inkarah hian Burma Kuhva ro te hi dah thuhruk a nih thu an sawi a ni. Motor khalhtu hi Hussein-a, Silchar lam ni nia insawi niin, Mizote nen an rawn chuan chhoh thu leh Gate thlenhma deuha Gate clear tur anga insawiin a chhuksan thu a sawi a, Driver hian Mizote chu ko tur anga insawiin an kalsawn a, a tlanbo zui bawk. Heng Kuhvaro te hi halral nghal niin Motor hi Nabazit Banik, West Tripura ta nia hriat a ni.

Lawngtlai-a KVK te chuan hlawhtling takin Buhtun an tharchhuak.

Mizoram-a Internet provider pahnih, Airtel leh Reliance Jio  chuan hun reilote ah 5G pekchhuah an tum tih an sawi.

Sawrkar kum kal mek 2022-2023 (April - December) chhungin Mizoram tlawhtu khualzin 1,64,048 an awm a, chung zinga mi 2,300-te chu rampawn atanga kal (Foreign Tourist) an ni a, kum 2009-2010 atanga chhiarin kumin, 2022-23 hi Mizoram in khualzin a neih tam ber kum a ni.

Environment, Forests and Climate Change Department kum 50 tlin lawmna chu Inrinni khan Aizawl Bethlehem Vengthlang-a Forest Training School-ah neih a ni a, EF&CC Minister TJ. Lalnuntluanga chuan a hmanpui a ni.

Kumin-a kangmei venna kawnga hmalak dan tur ngaihtuahin District Fire Prevention Committee chu nimin khan Serchhip DC Meeting Hall-ah an thukhawm.

Serchhip District Carrom Association in an buatsaih ‘Republic Day Open 2023’ chu tunkar Ningani khan khelh a ni. Serchhip DRDO Conference Hall-a ‘Republic Day Open 2023’ ah hian Mizoram hmun hrang hrang atangin mi 25 an tel a, Category pathum-ah inelna hi neih niin Men’s Singles-ah C. Vanlalruata (Aizawl) chu champion in Lalmuanzova (Lunglei) chu pahnihna a ni a. Men’s Doubles-ah LC. Lalawmawia leh C. Lalrinpuia (Lunglei) te pakhatna niin V. Ram-hluna (Serchhip) leh Lalrinmawia (Thenzawl) te pahnihna an ni. Mixed Doubles-ah R. Zirsangliana leh H. Lalremruati (Serchhip) te Champion in Lalchhuanawma leh Zorampari (Aizawl) te pahnihna an ni bawk.

MJA Serchhip District buatsaihin Bangladesh atanga Mizoram-a raltlan te tanpuina atan nizan hmasa khan Serchhip-ah Charity Concert hlawhtling taka neih a ni.

UPC NEI hnuaia Penticostal Youth Department (PYD) te chuan nizan atang khan Pastor Bial hrang hrangah Bial Conference an hmang a, Serchhip Bial PYD Conference vawi 47-na chu Electric UPC Biak In-ah neih niin Serchhip Dinthar Pastor Bial PYD Conference chu Serchhip Dinthar UPC Biak In-ah neih a ni bawk a, naktuk Pathianni zan-ah an tiak ang.

Mizoram College hrang hranga Contract-a thawk Assistant Professors 64 te chu Higher & Technical Education Department hnuaiah dah ngheh niin an zingah hian Govt. Serchhip College-a thawk Lalmalsawmi (English), Dr. Zarzosanga (Pol. Science), Laldampuii (Education), Malsawmsangi Varte (Mathematics) leh C. Lalbiakvela (Geography) te an tel a ni.

Tlungvel Field Veng Branch YMA te chuan an huamchhunga chhungkaw pakhat chenna In chu hnatlang in an sak sak. Thudawn danin Sawrkar laipui atanga mirethei In sak tanpuina Scheme PMAY-G chu Tlungvel khua ah chhungkaw 39 ten a thawhkhatna Rs. 45,500/- dawngin an zinga mi chhungkaw pakhat chu rualbanlo an nih avang leh mahni a In sa thei an nih loh avangin YMA te hian hnatlang in In hi an sak sak a, YMA te hi ni 5 chhung hnatlang tawhin tha 152 an seng tawh a, In sak hnatlang-a thawk turte hi an inruat bakah mi tlawmngai ten an pui thin bawk a, bialtu MLA le Minister Er. Lalrinawma chuan In chung tur Rangva bundle 4 pein In hi Assam Type in an sak sak a, In sak hna zawhfel hma chu hnatlang hi neih zel tur a ni ang.

G20 Chief Coordinator Harsh Vardhan Shringla chuan March ni 2-a Mizoram in G20 Business-20 Meeting a thlen tura inbuatsaihna hrang hrang te enfiah turin nimin khan Aizawl a rawn thleng a. Lengpui Airport-ah Tourism Principal Secretary Manisha Saxena leh sawrkar mi pawimawh ten lo dawngsawngin Lengpui tumhmuna inbuatsaihna kal mek te a enfiah nghal a. Business-20 Meeting neihna tur Mizoram University Auditorium leh Multipurpose Hall te pawh enfiahin MINECO-ah G-20 Core Team leh a hnuaia Committee pengte thutkhawm a neihpui zui bawk a ni. Harsh Vardhan Shringla hian tukin hian Chief Minister Zoramthanga a hmu anga, hemi hnu hian Mizoram a chhuahsan leh nghal dawn a ni.

Nimin khan Chief Minister Zoramthanga hovin Cabinet Meeting chu CM Cabinet Meeting Room-ah neih a ni a, he thutkhawm ah hian sawrkar Department hrang hrang atanga thu pawimawh lutte ngaihtuah niin Commonwealth Games Gold Medalist Jeremy Lalrinnunga hnena Ainawn Veng a In hmun, General Administration Department hnuaia awm chu pek ni se tih chu pawm a ni.

Health & Family Welfare Department chuan hun engemaw kalta atang khan phailam atanga lakluh buhfai chi khat, ‘SURAJ Premium Grader Rice’ chu him lo leh hrisel lo, mihring ei atana tha tawk loa hriatna a awm avangin Mizoram hmun hrang hrangah rinhlelhna leh khapna hial tihchhuah te a awm thu an sawi a. Hemi avang hian Food & Drugs Control Administration, Health & Family Welfare Department chuan he buhfai hi Laboratory (Guwahati)-ah thawnin endik a nih thu leh Test hrang hrang atangin he buhfai, Suraj Premium Rice hi mihring ei atan a him tawkin danin ei tlakah a pawm thu leh ei atan a him tawk thu an sawi.

Mizoram People Forum (MPF) General Headquarters President atana thlan thar Mizo-ram Synod Moderator Rev. Dr. C. Chawnghmingliana chuan Rev. Dr. Vanlalnghaka Ralte hnen atangin nimin khan mawhphurhna a la.

All India Radio (AIR), Lunglei in Full Fledged Digital Studio a kalpuina tur leh tun thla ni 31 thleng Sawrkar laipui flagship programme Swachh Bharat kalpuina hun chu nimin khan neih a ni a, AIR Director, Mizoram Cluster Head DR. Lalropuia chuan a hmanpui a ni.

Nimin khan Lawngtlai-ah District Level Socio-Economic Development Policy (SEDP) Committee chu an Chairman leh Lawngtlai Bawrhsap Amol Srivastava hova thukhawmin Line Department hrang hrangte hmalak dan an thlirho.

Nizan hmasa dar 7:30 vel khan Balaji Construction Pvt. Ltd. hnuaia thawk mi 3 te chu Khawzawl-ah kawngchhak leimin in a chhilh a, an vai hian a hmunah an thi nghal.

Central YMA hruaitute leh Mara thalai pawl, Mara Thyutlia Py ( MTP) hruaitute chu nimin khan Aizawl-a Central YMA Office-ah an inkawm.

Governor Hari Babu Kambhampati chuan nimin khan Bharti Airtel Ltd. a Zonal Officer leh Engineer te chu Raj Bhavan-ah kawmin Airtel in Mizoram hmalakna liantham a neih mek te, an harsatna leh hmachhawp pawimawh an neih te an sawiho.

North Vanlaiphai bialtu MLA hlui Lalrinmawia chu niminpiah khan boralin nimin khan a chenna Aizawl Luangmual-ah vuiliam a ni.

Vantlang atanga TB damlo te chawtha hmanga tanpuina Programme, Pradhan Mantri TB Mukt Bharat Abhiyaan, Community support to TB Patients hnuaiah Mizoram-a mi 61 ten TB vei enkawllai te an tanpui mek a. Nikum chhung khan Mizoram-ah TB vangin mi 59 an thi thung.

India Republic Day vawi 74-na chu nimin khan ramchhung hmundangte rualin Serchhip-ah pawh Sports Complex-ah urhsun taka hman a ni a, Serchhip District Bawrhsap Nazuk Kumar IAS chuan India Hnam Puanzar pawt parhin Parade Contingent te Chibai buk a chhanglet a, mipuite hnenah thuchah a sawi bawk. Bawrhsap chuan India ramin zalenna hmua a chhunga cheng mipuiten kan duan ngei ram Danpui (Constitution) kan nei chu a ropui em em tih sawiin, Danpui tha tak zarah kan ram chu kum reilote chhunga khawvela ram thil tithei leh ropui berte zinga mi ah kan inhlangkai tih a sawi a, “Mizoram pawhin hmasawnna a hmu nasa em em a, kan District ngei pawh Mizoram chhunga hmasawnna hmu nasa berte zinga mi kan ni awm e,” tiin tunhnaia sawrkar hmalakna hrang hrangte a tarlang nghal bawk. Mipuiten nun ralmuang kan neih theih nan Police Department ten nasa taka hma an lak thu Bawrhsap chuan sawiin, kum 2022 chhung khan thubuai 161 ziahluh niin heng zinga 137 chu Chergesheet siamfelin, an zinga thubuai 10-ah...

Serchhip Sub-Hqrs. YMA chuan nimin khan SEC thutkhawm an President, Kawlthuama kaihhruaia neiin Serchhip Sub-Hqrs. YMA Conference vawi 7-na chu April 27 leh 28 khian Chhingchhip Venghlun Khelmual-ah neih nise an ti a. Sub-Hqrs. YMA Conference thlengtu chu Rs. 100,000/- leh Rorel Inkhawm thlengtu Rs. 50,000/- a tanpui thin nise an ti bawk. Heng bakah hian Serchhip DIET Hostel Building sak meka harsatna awm chu Vigilance and Monitoring Committee in a tul angin lo bawhzui se an ti a. Kumin March 3-a Chapchar Kut hman dan tur ruahmanna siam relin, Khawhar lenpui hun chungchangah Central YMA kaihhruaina, Ruang thlak atanga zan thum tih chu ngai pawimawha zawm theuh nise an ti bawk.

Serchhip-a India Republic Day lawmna nimin-a neih ah a vawi khatna atan Parade Commander atan Hmeichhia hman a ni.

Nimin-a India Republic Day lawmna Serchhip-ah neih ah Faina kawnga inelna chi hrang hranga tithate hnenah lawmman semna neih a ni.

Serchhip Photographer’s Association (SPA) chuan nimin khan kum 2023 chhunga an hruaitu tur thlanna neiin President-ah Elisian-mawia Sailo (Bazar Veng); Vice President-ah Lalthianghlima (Vengchung) Secretary-ah K. Lalpekhlua (Dinthar Veng), Asst. Secretary-ah Lalbiakhlua Tochhawng (IOC Veng); Treasurer-ah Zothanpari (AOC Veng) leh Fin. Secretary-ah Lalsiampuii (New Serchhip) te thlan an ni.

Mizoram Khawpui Fai Inelna, 2022-a tithate chua nimin khan puanchhuah niin Serchhip District chuan District Headquarters zingah Fai lawmman pathumna a dawng a ni.

ZPM Thalaite chuan Mizoram District hrang hranga DIET Lecturer-te leh thawktu dangte chuan thla 6 chhung hlawh an la tawh lo nia sawiin, DIET-a thawkte an rilru a hahin an mangang hle tih thuchhuah siamin an tarlang a. Hei hian MNF kaihhruai Mizoram sawrkârah zirna in ngaihsak a hlawh lohzia a târlang chiang hle nia tarlang bawkin, DIET zirtirtute leh thawktute hlawh tâng pe tur leh thla dangah pawh a hun taka pa tura sawrkar an phut thu an sawi bawk.

Nizan hmasa khan ramchhunga Civil mi te chawimawina sang dawng turte puanchhuah leh niin Mizo pipu zai-a zai thiam lar KC. Runremsangi chu Mizo ziarang tih hausak leh humhalh kawnga a thawhhlawk avangin Padma Shri dawng tura thlan a ni a. KC. Runremsangi hian kum 2017 khan India rama Hnam ziarang leh nunphung pholanna (performing Arts) lama thawk thate chawimawina sang Sangeet Natak Akademi Award a lo dawng tawh bawk a ni.

Bangladesh-a hralh tura dân loa ramri kânpui tum ni ngeia an hriat vanga Tlabung Branch YMA-in an man kuhvarah chu nimin khan an hâlral a ni. Tlabung Branch YMA hruaitute chuan, tun tuma kuhva an hâl chhiat tak neitute hian a tirah dan anga chhiah an pek thu an sawi avang leh kuhva hi a hring a lo nih bawk avangin an khaw lama phurhlet nan a neitute chu ni 3 chhung hun an pe hmasa phawt tih an sawi a, hemi hnu hian khawchhung hêlin ramri kan theihna hmun an panpui tih an hriat veleh umzuiin Kawrpuichhuah-ah kuhva bag 57 chu a phurtute chawpin an man ta niin an sawi a ni.

Mi 12 in nunna an chan phahna, nikum November 14 chawhnu dar 2:40 vela Hnahthial leh Lunglei inkar, Maudarh khaw bula ABCI Infrastructures-in lung an lâkna quarry a chim chungchangah National Green Tribunal (NGT) Principal Bench, Delhi chuan ABCI-te chu cheng vbc. 70 chawi turin a hrem. He thil thleng chungchangah hian NGT-te hian Suo Moto hmangin thubuai an ziaklut a, thil thlen dan an chhuizui hnuah tun thla ni 23, 2023 khan thutlukna siamin, ABCI-te chu Environmental Clearance tel lova quarry an kalpui avangin Environmental Compensation cheng vbc. 70 chawi turin a ti a. Pawisa hi thla khat chhungin Mizoram Chief Secretary hnena pek (deposit) tur a ni.

FCS&CA Department chuan Cooking Gas/LPG hmangtute tan IOCL hotuten, Clause 5.3 of LPG Manual version 2.0 in a phut angin IOCL hnuaia LPG connection (domestic) nei te chuan kum 5 chhungin Mandatory Inspection tum khat tal neih tur a ni tih thuchhuah a siam a. Declaration sign duh lo ten Gas an la chhunzawm lo anih pawh sawi buai thei dawn lo.

Niminpiah Nilaini khan Hrianghmun khua ah kangmei chhuakin In 4 a kangral vek a, In pakhat erawh a then kangin mi tlawmngai ten an thelh thei thung.

Mizoram-a Eye Bank a awm hnu, July 2008 atanga nikum 2022 kum tawp thleng khan Mizoram-ah midang tana Mit pe mi 932 an awm tawh a, chung atang chuan a mamawh mi 447-te chu hlawhtling taka an Mit thlaksak an ni tawh.

Bharat Petroleum Corporation Limited (BPCL) hnuai a awm, North East (Shillong) Region-a Filling Station tha tehna 'Quality & Quantity' (Q&Q)-ah C. Vanlalruata Filling Station (near Chite Lei, Bethlehem Vengthlang) chu 2022-2023 chhunga Filling Station tha ber ah thlan a ni.

India Republic Day vawi 74-na chu nimin khan Aizawl-ah pawh neih niin Governor Hari Babu Kambhampati chuan India Hnam Puanzar pawtparhin Parade Contingent 26 ten Hnam Puanzar zahna chibai an buk chu a chhanglet a, mipuite hnenah thuchah a sawi bawk.

National Voters’ Day vawi 13-na chu nimin khan ramchhung hmundangte rualin Serchhip-ah pawh District Bawrhsap Nazuk Kumar IAS hovin hman a ni a, kumin-a National Voters’ Day-ah hian thupui atan ‘Nothing like voting, I vote for sure’ (Vote thlak tluk a awm lo, Vote ka thlak ngei dawn) tih chu hman a ni.

Nikum 2022 chhunga Serchhip District Transport Officer (DTO) Office-a lirthei ziahluh thar zinga a zatve aia tam chu lirthei ke hnih nei (Two Wheeler) a ni.

Republic Day Volleyball DC Running Trophy chu nimin khan khelh zawh niin Mipa-ah Serchhip Vengchung VC leh Hmeichhia-ah Bungtlang VC te an Champion.

Vawiin January 26, 2023 hi India Republic Day vawi 74-na a ni a, ramchhung hmun hrang hrangah uar leh urhsun taka hman a ni ang.

Chakma Autonomous District Council (CADC) sawrkar chu Larsap Dr. Hari Babu Kambhampati thutlukna angin thiah a ni. District Council & Minority Affairs Deputy Secretary chuan nimin khan CADC thiahna thupek hi a chhuah a, Sixth Schedule dan hnuaia thuneihna pek angin Larsap thutlukna ang hian thiah a ni.

Excise Minister Er. Lalrinawma chuan nimin khan Aizawl-a Excise Commissioner Office, Aizawl District Excise Office, Rangva-mual Outpost leh Bawngkawn Excise ram te chu a tlawh a, Minister chuan Excise Department-a thawktute chu midang tana inpe thin leh midang nunna hial chhanhimsak thintu an ni tih a sawi bawk.

Nikum December 13-a Minister of State atanga banna thehlut Dr. K. Beichhua chu Party dan kalha a chet avangin nimin atang khan MNF party Primary Member atanga chawlhtir a ni a, a rual hian MADC-a MDC nilai N. Viakhu pawh chawlhtir a ni bawk. Heng mite Party-a chawlh-tirna lehkha ah hian MNF President Zoram-thanga chuan hming a ziak a ni. MNF Primary Member atanga chawlhtir a nih chungchangah Dr. K. Beichhua chuan ban ngai tur khawpa tihsual a neih a hriat loh thu sawiin, a awm zui zel dan tur ala sawi theihloh thu a sawi bawk.

National Highway-6 Khawzawl leh Cham-phai inkar siam hna Shri Balaji Construction Company (BCC) ten an thawh mek chu nimin khan Khawzawl DC CC. Lalchhuangkima chuan tlawhin NHIDCL leh Company te nen Blacktop hna an thawh mek an enfiah a, hun remchang hmasa ah NGO hruaitute leh MJA te nen heng hmalakna te hi la thlirho leh nise an ti a ni.

Chief Minister Zoramthanga chuan nimin khan MHIP Ramhlun Venglai Branch Silver Jubilee lawmna PCI Ramhlun Venglai Centenary Hall-a neih chu hmanpuiin mimal, chhungkua leh khawtlang hmasawnna atana hriselna chu a pawimawh avangin ruihhlo mai bakah zuk leh hmuam laka fihlim chu chonaah lain, zuk leh hmuam laka indopui kan puan a hun tawh tih a sawi.

Kolasib District MJA chuan nimin khan Kolasib Press Club-ah Annual Conference hmangin I&PR Minister Lalruatkima chuan khuallian niin a hmanpui a, Ziakmite chu thu leh hla hmanga ram leh hnam rohlu vawnghimtute an nih thu leh thuziak chhiar tam mi chuan heng thu hmang hian finna an chharh chhuah thin thu a sawi a, lehkhabu chhiar tam chu thalaite zing ah intih-hmuh zel a pawimawh thu a sawi bawk. He hunah hian Khual zahawm MJA General Hqrs. President C. Lalrambuatsaiha pawhin Chanchinbumi hlawtling ni tur chuan midangte aia taimak chhuah a, thu rintlak, belhchiandawl leh tangkai ziah a pawimawh thu a sawi bawk.

Land Resources, Soil & Water Conservation Minister R. Lalzirliana chuan nimin khan Synod Hospital, Durtlang-a Coffee Plantation a hmunah a tlawh a, Synod Hospital Director Dr. Lalthakima chuan a lo dawngsawng a ni. Nimin a helai hmun a tlawhna hian Minister R. Lalzir-liana chuan kum 2014 vel bawr chho-a Synod Hospital-a thawktute leh Department te hmalakna a Hospital area-a mahni intodelhna rilru pu a Coffee an ching chu lawmawm a tih thu sawiin, Hospital area a thing hmang tangkaia Coffee kung 3000 vel an phun rah an sawngbawl nan Coffee Plantation Board atanga chah a nih mek thu a sawi a. He khawl hmang hian a rah hi an sawngbawl a, Synod Hospital-a thawktute leh damlo ten tangkai taka hmang turin a chah bawk.

ZPM Thalaite chuan MNYF President Dr. L.Thangmawia'n tun thla ni 23-a Hnam Run-a an party inkhawmah SEDP dawng tur thlan chungchâng ah Ruling leh Opposition bial-ah SEDP dawngtu inzat theuha ruahmana nih thu a sawi chu mipuite zah lohna leh mipuite hruai kawi thei tawngkam nia an hriat thu an sawi a. SEDP ah hian ruling leh opposition inthliarna nasa tak awmin, Local/Village Level SEDP Committee-ah ZPM kaihhruai LC/VC-ah te chuan ZPM LC/VC te thlim an nih thu an sawi bawk.

Officer on Special Duty (OSD) to CM Rosangzuala chuan nimin khan Chief Minister Zoramthanga hnenah OSD to CM a nihna leh MNF Headquarters-a Adviser to CM a nihna atanga banna a thehlut.

Mizo thalai Japan ram-a Nurse hnathawk tur mi 14 te chu NSDC-I tumsaka Delhi-a Japanese tawng thla 9 chhung zir turin nimin khan thlahliam an ni.

Mizoram Lok Sabha MP C. Lalrosanga chuan nimin khan New Delhi-ah hmarchhak bialtu Union Addl. Home Secretary Pijush Goyel chu Mizoram atanga kal Returnee hotute hmuhpuiin, Mizoram Inremna thuthlung anga returnee-te chhawmdawl chungchang a sawipui.

Mizoram Tourism Department bultumin nimin khan Tourism Minister Robert Romawia Royte hovin ‘National Tourism Day’ hman a ni.

Taxation Minister Lalchamliana chuan nimin khan Mamit Dinthar Veng-a Taxation Office Building thar chu a hawng.

AH&Vety Department-a Joint Director (Planning & Monitoring) leh a thawhpuite chuan nimin khan Serchhip-a Sa talhna hmun hman loha awm chu tlawhin a dinhmun an enfiah a, Serchhip-a VC leh Sazuar Association aiawhte bakah Sub-Hqrs. YMA hruaitute kawmin he Sa talhna hmun hman tangkai dan tur hi an sawiho bawk.

Ramchhung hmundangte rualin Serchhip District-ah pawh National Girl Child Day chu nimin khan hmang chhunzawmin a khana neih a ni a, National Girl Child Day pual hian kar kalta Nilaini atang khan Programme chi hrang hrang hman niin nimin khan District chhungah hmeichhe nau piang awm te thilpek hlan tur ni mah se piang an awm loh avangin hlan an awm lo thung.

Nikum chhung khan Serchhip District-ah naupiang 462 leh mitthi 364 awm anga chhinchhiah a ni.

Serchhip Addl. DC Lalmuansanga Ralte chuan Serchhip Hmar Veng-a cheng Laldinpuia lehkhabu ziak ‘Mipui Chanpual’ tih chu nizan khan a tlangzarh.

Vawiin January 25, 2023 hi ‘National Voters' Day’ a ni a, he ni hi Vote neih a pawimawh zia leh inthlanna a Vote thlak a pawimawh zia inzirtirna atan te hman tur niin Serchhip-ah chuan chawhnu dar 2:00 hian DC Conference Hall-ah hun hman a ni ang. National Voters' Day hi Election Commission of India in kum 50 a tlin lawmna atan kum 2011 atang khan rampumah hman thin a ni.

Serchhip District Volleyball Association buatsaih Republic Day DC’sVolleyball Running Trophy chu Vawiin chhun dar 12:00 hian Vengchung Volleyball Court-ah Final khelh a ni dawn a, Hmeichhia-ah Vengchung VC leh Bungtlang VC ten Final khelin Mipa-ah Serchhip Vengchung VC leh Hriangtlang VC ten Final an khel dawn a ni.

School Education Minister Lalchhandama Ralte chuan Primary School-ah Hindi Tawng zir a nih theihnan Central-ah Primary Hindi Teacher dil mek a nih thu leh a hlawhtlin ngei a rin thu Mizoram Hindi Prachar Sabha Chairman in nizan hmasa-a a kawmna ah a sawi a, Mizoram Education Services Rules chu buaipui mek a nih thu a sawi bawk.

Lunglei High Powered Committee Vice Chairman Lawmawma Tochhawng chuan nimin zing khan HPC sum cheng nuai 37 senga sak Executive Engineer, Irrigation & Water Resources Department (I&WRD) Quarters chu a hawng a, Lunglei Chanmari-a he Quarters sak thar hi RCC Building niin Zopa chhiara chhawng hnih a ni a, a dung ft. 40 leh a vang ft. 30 niin kum 2017 khan a sakna tur sum hi Lunglei HPC Fund atangin dah a ni.

Nimin khan Khawzawl District Bawrhsap CC. Lalchhuangkima kaihhruaiin NH. 6 kawng siam meka hmalak tawhna leh hmachhawpte sawihoin Khawzawl DC Conference Hall-ah thutkhawm neih a ni a, he hunah hian Bawrhsap chuan kawng siam hna thawktute chu Fur ruahtui tlak hma ngeia theihtawp chhuaha hna thawk tur leh Thal khawro laia chak lehzuala thawk turin a chah a. Harsatna leh mamawh an neihte thuneitute hnena thlen thuai thin turin a chah nghal bawk. He hunah hian sawrkar hotute bakah NHIDCL aiawhte leh Contractor 3 - Anusha Projects Private Limited (APPL), Dhariwal Buildtech Limited (DBL) leh Shri Balaji Construction Company (BCC) aiawhte an tel a ni.

State Animal Welfare Board chu nimin khan AH&Vety Minister Er. Lalrinawma hovin a Pisa-ah an thukhawm a, he hunah hian Secretary AH & Vety Lalzarmawii chuan Animal Welfare Board Committee hmalakna leh hma-chhawp hrang hrangte tarlangin, Welfare Board hian Act hrang hrang zirchianna neiin, mipui hnena nungcha chunga ngilneih inzirtina (Awareness) neih tam an rel a, Animal Welfare Board Executive Committee din nise ti bawkin, NGO's nena thawhdun chungchang pawh tarlan a ni a, Animal Birth Control din dan leh thil pawi-mawh dangte sawiho a ni bawk.

Social Welfare and Tribal Affairs Minister Er.Lalrinawma hovin nimin khan ‘National Girl Child Day’ kharna Inkhawm chu Tourist Lodge, Chaltlang-ah neih a ni.

Pachhunga University College Research Conclave 2023 chu nimin khan PUC Seminar Hall-ah neiin Higher & Technical Education Minister Dr. R. Lalthangliana chuan a hawng a ni.

Ministry of Home Affairs (MHA) chuan chhiatna hmachhawn dan chungchanga thawkthate chawimawina dawng turin Lunglei Fire Station chu thlan a nih thu tunkar Thawhtanni khan a puang.

Home Minister Lalchamliana chuan nimin khan Online ILP portal thar, ‘Revised Online Inner Line Permit (ILP) Portal Phase-I’ chu a tlangzarh a, ILP Portal Phase-I kaltlang hian Online hmangin Temporary ILP, Temporary Stay Permit leh ILP Exemption Certificate dil theih a ni ang.

Information & Public Relations Minister Lalruatkima chuan, “Mipui thlantlin Sawrkar chu sawisel ngam loh a nih a rem lova, Sawrkar tan inenletna tak tak a ni thei,” a ti.

Mizoram People's Forum (MPF) leh Political Party ten thawhhona thuthlung an siam sawihona chu nimin khan Synod Committee Room No. I-ah neih a ni.

Mizoram-a sawrkar hnathawk inzawmkhawmna pawl, FMGE&W chuan Dearness Allowance (DA) chungchang, hlawh lak tlai chungchang leh Pension kum atana 62 hman chungchang ngaihtuah turin February ni 1, 2023-ah General Council Meeting a ko a, a hnuaia Affiliated Association zawng zawngte chu aiawh tir ngei tur leh mahni Association ngaihdan leh hmalak duhdan fel tak neisa turin a beisei.

Nikum 2022-a National Achievement Survey (NAS) neih atanga Serchhip District-a hmasawnna tur awm leh zirlaite chaklohna ah hmasawnna a awm theih nan Post-NAS Training chu nimin khan Serchhip DIET-ah Serchhip SDEO hnuaia Mathematics Zirtirtute tan neih tan niin ni thum chhung Training hi neih a ni ang.

Lirnghing avanga chhiatna thleng palh thei laka chhanchhuah leh chhawmdawl hna thawh dan State pum huapa a tak anga enchhinna hun, ‘State Level Mock Exercise on Earthquake Disaster in Mizoram’ chu thla thar Feb. 2 khian neih a ni dawn.

MNF East Block Serchhip te chuan nimin khan Serchhip-a Mizo Hnam Run-ah Chhung Inkhawm neiin he hunah hian an Party hruaitu ten thu an sawi a ni.

Serchhip District Volleyball Association buatsaih ‘Republic Day Volleyball DC’s Running Trophy’ chu nimin khan Vengchung Volleyball Court-ah khelh tan a ni a, Mipa Team 5 leh Hmeichhia Team 3 telin Serchhip khaw pawn atangin Keitum, Bungtlang leh Hriang-tlang te an rawn tel a, Ningani khian Final khelh a ni ang. Nimin khan Match 6 khelh niin Vawiin hian zing dar 9:30 atangin Match chhunzawm leh tura ruahman a ni.

Nimin khan Champhai-ah District Level Fire Prevention Committee chu thukhawmin kumin a kangmei venna kawnga hmalakna tur hrang hrang an duang a, Champhai District-ah hian kum 2022 chhung khan ramkang tum 210 awmin ram hectare 3243.08 a kang nia chhut a ni a, heng zinga 209 chu Lo leh huan kang vang a ni.

Zirlaite’n mahni inringtawk leh huai taka Exam an hmachhawn theih nana Prime Minister Narendra Modi-a ruahmanna siam, ‘Pariksha Pe Charcha’ kalpuina chi khat atan nimin khan Aizawl Zemabawk-a Kendriya Vidyalaya School (KVS)-ah sikul naupangte tan lem inziahsiak neih niin School 5 atangin zirlai 65 an tel.

Governor Dr. Hari Babu Kambhampati chuan thla thar February ni 1 khian zan khat riak turin Champhai a tlawh dawn a, Governor lo dawnsawn dan tur leh a cham chhunga hun a hman dan turte chu nimin khan Bawrhsap hovin sawrkar mi pawimawh ten an sawiho.

Pathianni tlai khan Zuangtui Veng, Aizawl ah nupa a Two Wheeler-a chuang te chu eirawng-bawlna Gas phur Truck lehpelh an tumna lamah chesualin a hmunah an thi. Thudawn danin Pathianni tlai dar 5:30 vel khan Lalrampara (27) leh a nupui Lalmalsawmi (24) te chu Zuangtui Kudam kawng pheiah Bike a inphurin, Gas phur Truck nen an in pel tur chu an chesual a, Truck hian chil zuiin ka pawh chhawn lo in an pahnih hian an boral a, an ruang hi lumen a nih hnuah nimin khan vuiliam an ni. Lalrampara leh Lalmalsawmi te hian fa 1, kum 5 mi an nei a, a nupui hian nau thla 4 mi a pai mek bawk a ni.

Nimin khan Aizawl-a CM Office Conference Hall-ah kumin March ni 3-a Chapchar Kut lawm dan turin relin Chapchar Kut Organizing Committee chu an Chairman leh Chief Minister Zoramthanga hovin an thukhawm a. Kum hnih chhung hripui leng avanga Chapchar Kut hman dan thin pangngaia hman theih a nih loh hnuah kumin hian boruak a ziaawm tak avangin a hmaa lo tih thin angin huam zau taka hman ni leh se tih a ni a, District tin leh State pawna Chapchar Kut lawmna pual sum hman tur chung-chang te sawiho niin, a lawmna pui ber Aizawl Lammual-a hman dan tur chipchiar chu Prog-ramme Committee in a lo duan tura dah a ni. Kumin Chapchar Kut thupui (theme) atan ‘Zofate Inpum-khatna’ tih chu thlan niin Chapchar Kut Souvenir siam leh a ni anga, Kut pual hian mahni remchan dan anga Hnam thuam inbel tura in ngen nise tih a ni bawk.

Leilet-a buh chinte ei chhe thintu Khau chi khat, Brown Planthopper puang vangin nikum chhung khan Tlabung Sub-Division huamchhunga chhungkaw 280 bawr velin kum danga an Buh tharchhuah an pha lo.

National Student's Union of India (NSUI) Mizoram State te chuan Lengpui Airport-a Trolley hman tlak awm mang lo chu a hmuna kalin an enfiah tih an sawi.

Fisheries Minister K. Lalrinliana chuan, “Kan damkhawchhuah nan luidung-a nungchate kan man duh dan kan thlak a ngai a ni,” a ti.

Ni hnih awh tur National Workshop for State Legislators on State Finances chu Constitution Club of India, Rafi Marg, New Delhi-ah nimin khan neih tan a ni a, Mizoram atang pawhin MLA pathum an tel a ni.

Rualbanlote dawmkan kawnga thawk tha te chawimawina ‘State Award for the Welfare of Persons with Disabilities’ chu a vawi khatna atan hlanna hun hman niin Chhingpuii leh Commissioner Lalkiamlova te hnenah Chief Minister Zoramthanga chuan a hlan a ni.

Mizoram Police chuan Central Equipment Identity Registry (CEIR) chu hmang tangkai turin mipuite an chah.

Serchhip District-a North Vanlaiphai KVK hmun ah ‘International Year of Millet 2023’ pualin Zirtawpni khan Buhtun chin dan zirhona neih a ni.

Kumin-a Republic Day lawmna pui ber New Delhi-a January ni 26, 2023-a neih turah Mizo naupang pali (4) te chuan huaisen chawimawina (Bravery Award) an dawng dawn a, an zinga pahnih te hi Serchhip District mi te niin tunah hian chawimawina dawng turin New Delhi an thleng tawh a ni.

National Food Security Mission (NFSM) hnuaia KVK North Vanlaiphai (Serchhip District) te hmalakna chu Ningani khan NFSM Technical Officer Koushik Dutta chuan a hmunah a enfiah a. Koushik Dutta hi Serchhip atangin DAO Tlangtimawia Zote chuan tawimawin KVK North Vanlaiphai-a Senior Scientist & Head Dr. T. Vanlalngurzauva leh a thawhpui ten an lo dawngsawng a, KVK in hma an lakna hrang hrang a bu-a siam chu lo hlanin an hrilhfiah bawk a ni.

Nikum (2022) chhung khan Serchhip District Hospital-ah damlo inentir mi 23,824 awmin mi 2233 te chu admit an ni.

Inrinni khan Thalai Kristian Pawl (TKP) Thenzawl Pastor Bial te chuan Serchhip District Hospital Blood Bank-a dah turin thisen Unit 49 an pe a, heng mi tlawmngai te thisen la tur hian Serchhip Blood Bank atangin thawktute chu Thenzawl-ah kalin BCM Venghlun Sunday School Hall-ah thisen pekna hun hi neih a ni.

Mizoram Police CID (Special Branch) te chuan kar kalta Ningani kalta khan Heroin lem tawlhruk sahbawn bawm 30 leh a neitu nia hriat mi pakhat an man. Thudawn danin January ni 19 khan CID (Special Branch) te chuan an thu dawn bawhzuiin Lalhmingmawia (31), Bawngkawn hnen atangin Heroin nia hriat chu sahbawn bawm 30-a dahin an man a, amah-erawhchu ngun taka endik a nih hnuah heng Heroin te hi a lem a ni tih leh Heroin ngawlvei te hnena zawrh tur ni ngeia an hriat thu an sawi a. CID (Special Branch) te chuan heng Heroin lem te hi taksa tan a hlauhawm hle tih an sawi bawk.