Latest News

Revised Online ILP Portal Phase-I hawn a ni

Home Minister Lalchamliana chuan nimin khan Online ILP portal thar, ‘Revised Online Inner Line Permit (ILP) Portal Phase-I’ chu a tlangzarh a, ILP Portal Phase-I kaltlang hian Online hmangin Temporary ILP, Temporary Stay Permit leh ILP Exemption Certificate dil theih a ni ang.

    Secretariat Conference Hall-a Revised Online Inner Line Permit (ILP) Portal Phase-I tlangzarhna hunah hian Home Minister chuan ILP kenkawh kawngah rahbi thar kan chuangkai tih sawiin, ILP chu hnam changkang zawk leh tam zawk ten min chimral loh nan British hovin kum 1873 khan min lo siamsak thu leh kumin hi ILP kan neih kum 150-na a nih thu a sawi a, “ILP hi kan inhumhimna atana pawimawh a, kum 1986-a India sawrkar leh MNF ten inremna thuthlung an ziahah pawh Mizoram sawrkar rawn lovin ILP hi hlih theih a ni lo tih a awm a, humhim turin kan tanrual zel a pawimawh a ni,” a ti bawk.

Online ILP portal hman a nih hma hi chuan ILP zawng zawng hi Manual /Offline a pek thin a ni a, Mizoram-a rawn lut turte tan Mizoram House-ah emaw, Check Gate-ah emaw, Lengpui Airport-ah emaw Temporary ILP lak a ngai thin a. Heng Temporary ILP Issueing Authorities-ah te hian khualzin tan rei tak tak nghah a ngai thin a, harsatna an tawk thin a. Heng harsatna te hi sutkian a nih theih nan Home Department chuan ICT Department nen tangkawpin Online ILP Portal chu December 16, 2019 khan Home Minister-in a lo hawng tawh a ni.

Kum 2019-a Online ILP portal hi hman a nih hnuah a tul anga tihchangtlun chhoh mek a nih laiin COVID-19 hripui in Mizoram a nuai tak avangin kum 2020 March khan Thlawhtheihna leh lirthei hmanga International leh Inter-State inkal-pawhna zawng zawng chu ram chhungah khar vek a ni a. Online ILP portal pawh tihtawp lailawk a nih bakah ILP pekchhuah hrim hrim pawh tihtawp a ni a. Tunah hian a thar siam leh a ni ta a ni.

Revised Online ILP Portal hmanga application lut te chu Home Department in verification/checking an nei anga, Verifying/Checking Authority ten an enfiah vek hnuah Approving Authority-te'n an approve leh anga, Approving authority hi OSD-cum-Joint Secretary leh Superintendent, Home te an ni. He Online Portal hmang thiamlo te chuan Mizoram House-ah emaw, Entry Point Vairengte-ah emaw, Lengpui Airport-ah emaw Online-a upload sak turin puihna an dil thei anga, Mobile Signal awm miah lohna - Phaisen, Saiphai leh a dangte ah chuan Manual-in an dilin pekchhuah thei an la ni anga. ILP dam hun chhung a zirin Fee chawi ngai erawh a danglam thung a ni.

Comments

Popular News (Last 30 Days)