Food Licensing and Registration Camp nei mek

Health Department hnuaia Food and Drug Administration (FDA) chuan tunlai hian Ser-chhip District-ah 'Food Licensing and Registration Camp' an nei mek.
    Serchhip CMO Office-a Deputy Director (FDA) Sarah Laldintluangi chuan eitur lam chi thil chi hrang hrang zuartute chuan Food Safety and Standards Authority of India (FSSAI) hnuaiah Registration ti-a License an neih ngei a tul thu a sawi a, amaherawh chu he Dan hi khauh taka kenkawh ala nih loh avangin inhriatthiamna nen an la kal mek thu a sawi a. Eitur chi hrang hrang zuartute tan hian 'Food Licensing and Registration Camp' hi Serchhip District-ah neih fel a nih hunah chuan he Dan hi khauh zawka kenkawh anih dawn thu a sawi bawk.

'Food Licensing and Registration Camp' hi Serchhip District hmun 4-ah neih tura rua-hman phawt niin Registration leh License dil mi 100 ve ve tal awm tura beisei a ni a, tunah hian Thenzawl-ah neih ni tawhin nimin khan Ser-chhip-ah neih leh a ni a, New Serchhip leh North Vanlaiphai-ah neih leh tura ruahman a ni bawk.

Food Safety and Standards Authority of India (FSSAI) hnuaiah hian ei leh in kaihhnawih a sumdawng, kum khat a sum cheng nuai 12 aia tlem turnover nei te tan Registration tih tur niin kum khat atan Rs. 100/- zel Registration Fee chawi a ngai a. Kum khat a turnover cheng nuai 12 aia tam nei te chuan License an neih a ngai thung a, an Unit a len dan a zirin kum khat atan Rs. 2000/- leh a aia tam License Fee hi an chawi a ngai ve thung a, heng fee te hi kum 5 zel atan pek lawk theih niin tunah hian Registration leh License dil te hi tih theih reng a ni bawk.