National Girl Child Day kharna Minister in hmanpui

Social Welfare and Tribal Affairs Minister Er.Lalrinawma hovin nimin khan ‘National Girl Child Day’ kharna Inkhawm chu Tourist Lodge, Chaltlang-ah neih a ni.

National Girl Child Day kharna hunah hian Er. Lalrinawma chuan Mizo nunphungah hmeichhiate dinhmun pawimawhzia sawiin, “Chhungkaw hrang hrang ah te, khawtlang leh Veng tinah Hmeichhiate mawhphurna hi a sang hle a ni,” a ti a. Hmeichhia te chu tuna an thlen chinah duhtawk mai loa theitawp chhuah zel turin a fuih a, Sawrkar Laipui leh Mizoram Sawrkar pawhin hmeichhia te chanvo humhim leh vawn dik hi a ngai pawimawh thin hle tih sawiin, “National Girl Child Day hian rahtha chhuah se, mahni nihna leh awmhmunah theuh rahbi thar min rahtirtu ni ngei se, hmeichhe naupang dikna leh chanvo vawnhim sakin, khawvel hmaah hmeichhia te hian kan hnam min chawimawi thei a ni,” a ti bawk.

SW&TA Miinister hian National Girl Child Day puala zirlai naupangte tana lemziaka inelna Primary, Middle, High School & Higher Secondary hrang hrangte tana buatsaiha ti thate hnenah lawmman a sem nghal a ni.