Mizoram-ah midangte tana Mit pe 932 awm tawh

Mizoram-a Eye Bank a awm hnu, July 2008 atanga nikum 2022 kum tawp thleng khan Mizoram-ah midang tana Mit pe mi 932 an awm tawh a, chung atang chuan a mamawh mi 447-te chu hlawhtling taka an Mit thlaksak an ni tawh.

    July ni 31, 2008-a Aizawl Civil Hospital Eye Bank hawn anih hnuah thih hnua Mit pe tura intiam mi 8,500 an awm tawh a, midang tana Mit pe te Mit lak a nih hian mitthi hmel leh lan dan a tihmelhem lo va, Mit lak chhuah chhung pawh minute 10 leh 15 vel chauh a ni tih thawktute chuan an sawi a. Mi hrisel tha pangngai, naupang atanga Tar thlengin Mit hi a pek theih a. HIV/AIDS, Septicemia leh thisen atanga inkaichhawn theih natna vei tan erawh pek a rem lo thung.

Civil Hospital Aizawl Eye Bank-a Counsellor Mimi Zodinthari sawi danin mipui zingah khaw hmu thei lote tana Mit pe an tam zel a, midang tana malsawmna a nihna mipuiten an hre chho zel a, kawng hrang hrangin a hlutna tihdarh zau zel a ni. Eye Bank-a thawkte sawi dan chuan mi 300 velin an Mit thlakna tur mi in Mit an pek an nghak mek a, heng mite hian enfiahna hrang hrang an paltlang hnuah an Mit thlakna tur pe an awm chuan an Mit an thlak thei dawn a ni.

Midang ten khaw eng an hmuh theih nana Mit pek a pawimawh zia inzirtirna, ‘Eye Donation Fortnight’ chu ram pumah kumtin August ni 25 atanga September ni 8 inkarah hman thin a ni a; hei hi Prime Minister hlui Rajiv Gandhi-a’n a Mit a pêk atanga hman tan a ni.