Latest News

Zirlai ten thisen Unit 46 pe

Image
Nimin khan Govt. Serchhip College zirlai te chuan Serchhip Blood Bank-a dah turin thisen Unit 46 an pe. Rampum-a 'Ayushman Bhava' kalpui meka Sewa Pakhwada hman mek denchhen leh Govt. Serchhip College in kum 50 a tlin lawmna bakah NSS Foundation Day lo thleng tur den-chhenin nimin khan Govt. Serchhip College NSS Unit leh NCC Air Wing te chuan Serchhip Blood Bank-a dah turin thisen Unit 46 an pe a, thisen petute hi mipa 22 leh hmeichhia 24 niin heng mi tlawmngai te thisen la tur hian Serchhip Blood bank-a thawktute chu College-ah hian kalin thisen hi an lak sak a ni.

Pachhunga University College Research Conclave nei

Pachhunga University College Research Conclave 2023 chu nimin khan PUC Seminar Hall-ah neiin Higher & Technical Education Minister Dr. R. Lalthangliana chuan a hawng a ni.

He Conclave hawnna ah hian H&TE Minister chuan PUC in Reseach Conclave 2023 ropui tak a buatsaih avangin lawmthu a sawi a. Tun dinhmuna Research Scholars 61 an nei thei leh thlatin International Research Paper publish thei Institution a nih avangin leh kum 6 kalta chhunga Journal leh lehkhabu publication 750 chuang an nei thei chu hlawhtlinna ropui tak a tling tih a sawi a. PUC hian Undergraduate Course Subject chi hrang hrang 23 zirna neiin, heng bakah Post Graduate zirna Mizo, Philosophy, Life Science, Geophysics Department a nei hi hmasawnna nasa tak a ni, a ti a. Session tharah Philosophy Department-ah PhD zirna tura ruahmanna awmsa pawh Mizo ten zirna lama finna kan neih zau nan rahbi pawimawh tak a nih thu a sawi bawk.

He hunah hian PUC in khaw pali- Phulpui, Lungleng, Dulte leh tunhnaia an adopt Khawrihnim-a hma an lakna te tarlan niin Adopted Village atan hian PUC Faculty ten pawisa thawhkhawmin hemi atang hian Life skills, College Admission leh thil dangah te awareness campaign leh tlawhchhuah program an nei thin a ni.

Comments

Popular News (Last 30 Days)