KVK Lawngtlai ten Buhtun tharchhuak tawh

Lawngtlai-a KVK te chuan hlawhtling takin Buhtun an tharchhuak.

    Kumin hi United Nations Organization chuan Buhtun chin uar kum, Internation Year of Millet-ah a puang a, Loneitute Inzirna School ti-a hriat, Krishi Vigyan Kendra (KVK) Lawngtlai chuan Chawnhu-a an hmunpuiah nikum khan Buhtun hi hlawhtling takin an lo ching chhin tawh. KVK Lawngtlai-a Senior Scientist & Head Dr. C. Lalfakawma chuan Buhtun an chin chhin chu Foxtail Millet, PRK-1 Variety, Tripura atanga a chi an lak a nih thu a sawi a. Buhtun an chin chhinna chu Tuifinriat zawl atanga tehin ft. 3,300 a sang a ni a, hetah hian hlawhtling taka an tharchhuah thu te, loneitute tan Lawngtlai District-ah Buhtun chu hlawk taka tharchhuah theih a ni tih an  chin chhinna atanga a lan thu a sawi a ni.

India chuan khawvel pumah uar zawka Buhtun chin a nih theih nan UNO-ah rawtna thlenin, ram 72-ten India rawtna chu thlawpin United Nations Organization chuan kumin 2023 hi Buhtun chin uar kum leh Buhtun ching tura inzirtira hmalak uar kum, ‘International Year of Millet’-ah a puang a. India chu khawvel pumah Buhtun tharchhuak hnem ber ram a ni a; khawvel puma Buhtun tharchhuah zaa 38 a thar a ni.