Latest News

National Defence College, New Delhi-a training lai Sipai Officer rual ten Serchhip District an tlawh

Mizoram tlawha rawn zin mek Ministry of Defence hnuaia National Defence College, New Delhi-a training lai sipai hotulu te leh faculty te chuan nimin khan Serchhip District rawn tlawhin Thenzawl-a Golf Course & Resort-ah Addl. DC Lalmuansanga Ralte leh SP Stephen Lalrinawma hovin sawrkar mi pawimawh ten an lo dawngsawng.

National Defence College, Ministry of Defence, New Delhi-a National Security & Strategic Course zir mek India Sipai Officer te leh India thian tha ram dang paruk (6) atanga sipai Officer mi 18 te hian niminpiah khan Mizoram rawn thlengin an cham chhung hian Mizoram chhunga District pathum - Aizawl, Serchhip leh Kolasib te an tlawh dawn a. Mipui mimir hmasawnna leh chawikanna lam hawi sawrkar hmalakna hrang hrang - Rural Development, Panchayati Raj, Law and Order, Women Empowerment, Health, Agriculture, Education, Energy Sector te bakah tlawmngai pawlte hnathawh dan te an zir dawn a. Nimin khan Serchhip District rawn thlengin Thenzawl-a Golf Course & Resort-ah Addl. DC Lalmuansanga Ralte leh Serchhip SP Stephen Lalrinawma bakah sawrkar mi pawimawh ten an lo dawngsawng a ni.


Heng mite lo lawmna puala inkhawm tawi Thenzawl-a Golf Course & Resort Conference Hall-a neih ah Thenzawl SDO (Civil) V. Lalmuanpuii chuan Mizoram tlawhtu heng Sipai Officer te lo lawmna thu sawiin, Serchhip Addl. DC Lalmuansanga Ralte chuan Serchhip District dinhmun tlangpui leh sawrkar hmalakna langsar thenkhat a tarlang a. Serchhip SP Stephen Lalrinawma pawhin venhimna chungchanga Serchhip District dinhmun tlangpui sawiin, Police Training School (PTS) Thenzawl-a Principal HL. Thangzuala; Thenzawl-a Horticulture College Principal Dr. Shri Dhar; Thenzawl DFO Lalbiakchama Chawngthu leh AH & Vety Department atangin Dr. Lalmuanpuia Samte te chuan an hmalakna leh hnathawh dan hrang hrangte an tarlang bawk a ni.

National Defence College-a Training mek Sipai Officer leh Defence mi pawimawh te rawn hruaitu NDC-a Faculty ni mek Major General Hari B.Pillai chuan National Defence College chu kum 1960 a din tan a nih thu leh tun he Course zir mekte hi Batch 63-na an nih thu a sawi a. National Security and Strategy Course zir tur hian India sipai, Army, Navy leh Air Force atangte leh India thian tha ramdang sipai, Colonel leh a chunglam chinte thlan thin an ni tih a sawi a. “Heng kan zirlaite hi India ram-chhung fan pui changte, a changin Foreign ram ah zinpui chang te neih thin a ni a. Tunah hian he Course zir mekte hi Team pasarih (7)-ah inthendarhin India ram hmun hrang hrang kan fang mek a, India rama hnam hrang hrangte nunphung leh hnamziate zira, mipui nunphung hre tura rawn zin kan ni,” tiin Thenzawl-a an lo dawn-sawn danah lawmthu a sawi a, Mizoram chu nuam an tih thu a sawi bawk.

National Security & Strategic zir mek ramdang Sipai Officer te hi France, Japan, Bang-lades, Bhutan, Uzbekistan leh Oman atanga rawn kalte an ni a. Anni ho leh India ram sipai Officer te hi Major General Hari B. Pillai, Senior Directing Staff (Army-III), Faculty, National Defence College hovin an rawn kal a. Nimin-a anmahni lawmna neih ah hian sawrkar Department hrang hrang hotute nen inkawmna neiin nimin tlai khan Thenzawl-a hmun pawi-mawh te tlawhpui an nih hnuah nizan khan Thenzawl-ah an riak nghal a. Vawiin hian Horticulture College leh Puantahna hmun te tlawhpui lehin PTS Thenzawl-ah chawchhun an ei anga. Hemi hnu hian Aizawl lam an pan leh nghal dawn a ni.

Comments

Popular News (Last 30 Days)