Mipui thlantlin Sawrkar chu sawisel ngam loh a nih a rem lova, inenletna a ni thei - I&PR Minister

Information & Public Relations Minister Lalruatkima chuan, “Mipui thlantlin Sawrkar chu sawisel ngam loh a nih a rem lova, Sawrkar tan inenletna tak tak a ni thei,” a ti.

    I&PR Minister hian nimin khan MJA Member te a Pisa-a leng-ah sawmin thingpui a inpui a, he hunah hian I&PR Minister chuan MJA leh thuthar thehdarhtuten Sawrkar an tawiawmna ah leh thawhhona ah lawmthu sawiin, “Mipui thlantlin Sawrkar chu sawisel ngam loh a nih a rem lova, Sawrkar tan inenletna tak tak a ni thei,” a ti a. “Amaherawhchu, sawiselna hi dengkhawng tak tak ni lovin sawrkar insiamthatna tur atana Constructive criticism ni zawk se, insiamthatna tura insawiselna hi mi tute pawhin kan tangkaipui a ni,” a ti a. Hemi kawngah hian chanchinbu Editor te kamchhuak Editorial chu hmanraw pawimawh tak a nih thu a sawi bawk.

Mizo tawng hman leh ziah dik chungchangah chanchinbu mite chu Mizo tawng humhalhtu leh thehlartu pawimawh tak an nih thu I&PR Minister chuan sawiin, tunlaia thuthar thehdarhna kawnga thiamna thar te hmang tangkai turin a fuih a. Social Media kaltlanga thu belhchian dawllo leh thu diklo vawrh lar a nasat thu sawiin, thuthar thehdarhtute chu mipui te zirtir kawngah theihtawp chhuahpui turin a sawm bawk a. Department hmalakna leh hmachhawp thenkhatte sawiin, Journalist Pension Scheme tihpuitlin a nih theih nan theihtawp chhuah a umzui mek zel a nih thu leh Thuthar thehdarhtute tan Study Tour leh Field Visit buatsaih thin hripui vanga kum 2 chuang chawlhsan tawh chu kumin-ah ruahmanna siam leh tum a nih thu a tarlang bawk.

I&PR Minister chuan MJA ten Covid hripui dona kawnga sawrkar an tawiawmna ah I&PR Department changtu Minister a nih angin lawmthu a sawi a. MJA te hamthatna atana Mizoram sawrkarin a theih anga anga kawng a dapsak dan te tarlangin, Press Enclave leh thil thenkhatah erawh beisei anga hlawhtlinna a la awm thei lo erawh chu pawi a tih thu a sawi bawk.

He hunah hian MJA General Hqrs. President C. Lalrambuatsaiha chuan I&PR Minister in an puala thingpui inhona leh inkawmna hun remchang a siam chu lawmawm a tih thu a sawi a. Hripui avangin chanchinbu leh a enkawltute chu a tuar nasa pawl niin anmahni a nghawng nasat thu a sawi a. Pension Scheme chu chak zawka bawhzui sak turin leh Press Tour leh Study Tour te buatsaihsak turin Minister chu a ngen bawk a ni.

Comments

Popular posts from this blog