Hnathawhna a vanduaina thleng ah mi 3 thi

Nizan hmasa dar 7:30 vel khan Balaji Construction Pvt. Ltd. hnuaia thawk mi 3 te chu Khawzawl-ah kawngchhak leimin in a chhilh a, an vai hian a hmunah an thi nghal.

    Thudawn danin Khawzawl Hermon Veng area-a Haukhawthanga huan mawnga National Highway kawng laih mekah Balaji Company-a hnathawk mek te chu kawngchhak lam leimin hian a chhilh a, chhiatna thlen thu hriat a nih veleh mi tlawmngai leh QRT Member te thawkchhuak nghalin heng mi te lakchhuah hna hi thawh nghal a ni a, amaherawh chu lakchhuah an nih chuan an lo boral hman tawh a ni. Vanduaina thlenga thi te hi Alok Mandal (29); Premkumar Mandal (34) leh Ratan Mandal (19) te niin an vai hian West Bengal vek an ni a, zan dar 9:30 velah ruang hi lakchhuah kim a ni. Police in an chhui chianna atanga a lan danin Retaining Wall an siam laiin kawng chhak leimin thutin heng mite hi a chhilh a ni.