G20 Chief Coordinator Harsh Vardhan Shringla’n Mizoram inbuatsaih dan a rawn enpui

Kumin March ni 2-a Mizoram in G20 Meeting a thlen tur atana inpuahchahna kal mekah Chief Coordinator Harsh Vardhan Shringla leh a thawhpuite chuan Inrinni khan Chief Minister Zoramthanga chu CM Cabinet Meeting Room-ah hmuin an inkawm a. Mizoram G20 Core Team leh Sub-Committtee te Meeting am neihpui mghal bawk.

CM Cabinet Meeting Room-a inkawmna ah hian G-20 meeting State danga lo thlen tawh dan tlangpui leh State hrang hrang inpuahchah dan te presentation pek niin, Mizoram atanga an beisei te sawi a ni a. India ramin G-20 Presidency a chelh chhung hian khawvel mit hmuha ram hmasawnna leh India rama hmun leh culture danglam tak tak mawina phochhuah a nih dawn avanga ngaihpawimawh tul an tih te tarlan a ni a. G20 Meeting an nghahna tur khawpui hrang hrang cheibawl kawngah leh, khawpui infrastructure tihchangtlunna atan remchanna la turin ruahmanna siam tha an tih thu pawh sawiin, Delegates te hi khawvel ram hrang hrang atanga lo kal tur an nih avangin hnam ziarang phochhuak a, mahni State theuh hmasawnna tur potential tarlan thiam pawimawh an tih thu sawi a ni.

Hemi hma Zirtawpni tlai khan Aizawl-a Secretariat Conference Hall-ah Mizoram G20 Core Team leh Sub-Committtee te chu Chief Secretary Renu Sharma hovin G20 Chief Coodinator Harsh Vardhan Shringla hian Meeting a neihpui a, Harsh Vardhan Shringla chuan G20 meeting 10 chu khawpui pakhua ah neih a nih tawh thu sawiin, India ram pumpuiah G20 denchhena Meeting 215 chu India ram khawpui 56 ah neih a nih tur thu a sawi bawk a. Mizoram in a lo thlen tur B20 Meeting ah G20 Branding pawimawhna te sawiin, Regional Language leh English hman te, ram dang atanga lo kal delegates leh Officials te tana hmuh nuam lo awm thei thilah khuhmawi/masking hmundanga an tihdan te sawiin, Mizoram sawrkar chuan Jan Bhagidari buatsaih a pawimawh thu te leh hmundangah chuan Cycle Rally leh Motorcycle Rally an neih thu te a sawi bawk a ni. Sustainable Development Goals in a ken tel recycle hmanga G20 Logo Hyderabad a an siam entirna hun a nei bawk a. Pune, Mumbai, Kolkata, Rajasthan, Manipur ten G20 denchhena an khawpui an chei danglam dan (transformed city) te an tarlang bawk.

Khawvel economy hmasawn zelna tur atan leh inrelbawlna atana ram sawrkar hrang hrang intelkhawmna pawl G20 hi ‘Group of Twenty’ (G20) tihna niin, ram 19 (Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Türkiye, United Kingdom leh United States) leh European Union te an tel a. Heng G20 ramte GDP belhkhawm hi khawvel GDP 85% a tling a, khawvel pum huap insum-dawntawnna za zela 75 (75%) chu G20 ram a thleng niin, khawvel mipui hmun thuma thena hmun hnih chu G20 rama chengte an ni bawk.

Kumtin G20 member ramte hian Presidency nihna an inchelh chhawk thin a. Nikum khan Indonesia in Presidency nihna changin, kumin-a India ramin Presidency a chelh chhung hian G20 meeting hrang hrang khawpui engemaw zat ah neih a ni dawn a. A Meeting pui ber G20 Summit chu kumin September thla khiaan New Delhi-a neih tura ruahman a ni. Aizawl-a G20 meeting thlen tur hi B20 tia hming vuah niin, ‘Multilateral Business Partnership Session’ a hman tur a ni.

G-20 Chief Coordinator hi sawrkar mi pawimawh hrang hrang ten rawn zuiin Mizo-ram-a Meeting neihna tur hmunhma te enfiahin sawrkar mi pawimawh te an kawm hnuah Inrinni khan Aizawl an chhuahsan a ni.