Thalai ten lehkha chhiar an uar theih nan Serchhip DIET in ‘Reading Day’ an buatsaih

Thalai ten lehkha chhiar an uar theihna tura hmalakna atan Serchhip DIET chuan nimin khan a tum hnihna atan ‘Reading Day’ an hmang a, he hun hi Serchhip District Bawrhsap Nazuk Kumar IAS chuan khuallian nia hmanpuiin Serchhip DIET bakah Govt. Chanmari P/S leh M/S zirlai naupang ten a huho in lehkha an chhiar a ni.

Serchhip District Institute of Education and Training (DIET) tual-a ‘Reading Day’ puala hun hman ah Serchhip District Bawrhsap Nazuk Kumar IAS chuan a nuam tih ber lehkhabu chhiarna atana ni buatsaih ah sawm a ni chu lawmawm a tih thu a sawi a, he huna kalkhawm zirlaite chu eng pawh nih tum se zirna chu a bulthut pawimawh ber a nih thu leh kawng engkima min kaihruaitu a ni tih sawiin, thiamna tak tak nei turin an zirlai mai bakah lehkhabu a tam thei ang ber an chhiar a pawimawh thu a sawi a. Zirlaite tanm lehkhabu an chhiar chuan an zirlai ah nasa taka a puih dawn thu sawiin, DIEt-a Training mek Zirtirtu ni tumte tan pawh an hnathawh tur kawngah a pawimawh thu leh hriatna zau zawk a pek theih thu te a sawi a, lehkhabu chhiar tam chuan ziak mite pawh nasa taka a puih thin thu te, Lehkhabu hrang hranga thupui hrang hrang ngaihnawm tak takte chuan zirna-ah leh nitin nunah a tha zawnga thui tak hna a thawh theih avangin Nitin lehkhabu phek khat tal chhiara bul tan thar leh theuh turin he huna tel te chu a chah bawk a ni.

Serchhip DIET Principal Lalrammawia kaihhruai he hunah hian khual zahawm MJA Serchhip District President C. Lalhminghlua chuan Serchhip DIET awmna chu tunhma deuh chuan Mual zawl, ram ro tak a ni thin tih sawiin, DIET Serchhip hawn a nih hnuah tha taka enkawl leh tunah chuan ngaw tha tak a ni tak avangin thawktute leh helai hmuna Training te hmalakna lawmawm a tih thu a sawi a. Tunlai khawvel-ah IT lama hmasawnna a nasa ta hle tih pawh sawiin, kan awmna hmun apianga Phone in hmun a chang zau ta hle tih a sawi a, amaherawh chu mi pawimawh leh thil hria ni tur chuan lehkha kan chhiar tam a tul thu sawiin, Lehkhabu chhiar-ah kan kir leh a tul thu a sawi a, kan dinhmun leh kan kum mil in lehkhabu tha chhiar tur a awm zel thu leh eng dinhmunah pawh ding ila lehkha chhiar tam phawt a pawimawh thu a sawi a. Chutiang a nih loh chuan thalai ten kawng dik lo zawk kan zawh palh a hlauhawm thu a sawi bawk.

Serchhip DIET ten Reading Day an buat-saih ah hian DIET Library-a lehkhabu chi hrang hrangte phochhuakin a duh apiang chhiar theih tura dah a ni a. He hunah hian DIET-a Training mek leh thawktute bakah Serchhip Chanmari Primary School leh Middle School-a zirlaite leh thawktute pawh an tel a ni. Serchhip DIET hian Nov. 15, 2019 khan Reading Day hi a vawi khatna atan an lo hmang tawh bawk a ni.