Serchhip-a OSC pantu pung

Hmeichhia harsatna tawk te tlukluh lailawkna In, Sakhi-One Stop Centre Serchhip chu nikum hmasa (2021) aiin nikum (2022) ah pantu an tam zawk.

    Ministry of Women & Child Development, Social Welfare hnuai a Hmeichhiate inhumhimna hmun Sakhi-One Stop Centre, Serchhip District-ah hian nikum 2022 chhung khan Case 26 ziahluh niin nikum hmasa a case ziahluh 19 aiin 7 zetin a tam zawk a. Nikum a Case ziahluh 26 zingah hian Domestic Violence kaihhnawih thubuai 3 awmin a dang zawng hi nupa inkar buaina leh bungraw inchuh thubuai a ni thung.

Nikum chhunga Serchhip One Stop Centre-a thubuai ziahluh 26 zinga 12-ah te hian harsatna tawk hmeichhia te chu riaklut (Shelter) a enkawl an ni a, thildang ah hian hmeichhia te  Counselling pek leh nupa a Counselling pek bakah Dan leh hrai chungchanga thurawn lo pek te pawh an awm bawk a ni.

Serchhip-a Sakhi-One Stop Centre hi kum 2019 September thla atang khan kalpui a ni a, kum 2019 atanga nimin thleng khan case 79 ziahluh a ni tawh a. He Centre pantu tam ber te hi Inchhungkhur-a hleilenna tuar te niin he Centre pantute hi a tul angin kawng hrang hrangah enkawlna pek thin an ni.