Mamit-ah Taxation Department Office hawng

Taxation Minister Lalchamliana chuan nimin khan Mamit Dinthar Veng-a Taxation Office Building thar chu a hawng.

    He Building thar hawnna hunah hian Taxation Minister chuan Taxation Department chu Mizoram Sawrkar tana sum khawntu ber anih angin tunah hian GST bakah Chhiah chi hrang hrang khawn mek a nih thu a sawi a. Cheng vbc. 730 Chhiah khawn tura Sawrkarin a tuk chu thla 9 chhung lekin vbc. 717 a khawn tawh a nih thu leh chutiang anih tak avang chuan Sawrkarin target tipungin vbc. 730 atangin vbc. 900-ah tihpun a ni tih a sawi bawk.

Taxation Minister chuan sawrkar in amah in pawisa a nei lo tih pawh sawiin, “Mipuite atanga chhiah hrang hrang khawn atangin Sawrkarin sum a nei chauh a ni tih hrereng chungin mipuite'n kan rilru put hmang kan tihdanglam a tul a, Chhiah pek kawngah rilru zau leh puitling tak kan put a ngai a ni,” a ti a. 14th Finance Commission hnu lamah Sawrkar laipui chuan kan Deficit Grant min pek tlem tial tial avangin zawi zawia mahni-a intodelh a, mahni ke-a din a lo ngaih tak avangin chhiah lakna kawnga a Department neitute chuan theihtawpa tan a ngaih lehzual tur thu a sawi bawk.

Mamit-a Taxation Office Building leh Chowkider Quarters sakna atan hian Estimate Amount chu cheng nuai 328.53 niin Oct. 31, 2019 khan sak tan a ni a, nikum March 30 khan sak zawh niin Mizopa chhiara chhawng 4 a ni a, a hnuai berah Parking awmin a dawt-ah Chowkidar a awm bakah kawng an leh a chung chu Office atana hman tur a ni.