Aizawl Sahuan-ah Sakei dah belh a ni dawn

Aizawl Zoological Park-ah Sakei (Bengal Royal Tiger) a nu leh a pa dah belh a ni dawn a, Nandankanan Zoological Park atanga lak tur niin, ruahmanna a kaltluan chuan thla thar February thla chhungin lak thlen theih beisei a ni. Hetihlai hian kum kal mek 2022-23, thla kua (April - December) chhungin Aizawl Sahuan tlawhtu mi 43,901 an awm.

Thudawn danin Nandankanan Zoological Park nen ramsa inthleng tawn (exchange programme) kaltlanga Sakei nu leh a pa lak tur chungchang ah Central Zoo Authority (CZA) atangin phalna hmuh fel a ni tawh a, Sakei an lak turte chu kum ngaa upa ve ve an ni a, Savawm leh Hauhuk pek an ni ve thung ang.

Nikum February thla khan Guwahati Zoo atangin ramsa inthleng tawn kaltlang thoin Sakei (keipui) lak a lo ni tawh a, a nu leh a pa lak tum a nih laiin, a nu chauh lak a ni a, kum 15 vela upa a ni.

Sakei dah belh turte hi a awmsa nen dah ho theih an nih dawn loh avangin tuna Sakei awmna chu a laiah phel (seperate) a ni a, a in thar (feeding cubicle) leh a tul huna dahhranna tur (kraal) thar siam a ni bawk. Kraal leh seperation wall chu zawhfel ni tawhin, Feeding cubicle thar sak pawh tunkar chho ah chuan zawhfel beisei a ni.

Hetihlai hian kum kal mek 2022-23 chhunga thla kua (April - December) chhungin Aizawl Sahuan tlawhtu mi 43,901 an awm a, chung atanga sum hmuh chu Rs. 7,53,700 niin sum hmuhna te hi Visitors, Motor Parking leh Camera/Video kenluhna man te an ni.

Comments

Popular posts from this blog