Luidung-a nungchate kan man duh dan kan thlak a ngai - Fisheries Minister

Fisheries Minister K. Lalrinliana chuan, “Kan damkhawchhuah nan luidung-a nungchate kan man duh dan kan thlak a ngai a ni,” a ti.

    Mamit District chhung Dapchhuah khua-a Luidung humhalh (Riverine Conservation) Awareness Programme nimin-a neih a hmanpuina ah Fisheries Minister chuan he thu hi a sawi a, luidung-a cheng nungchate kan humhalh a tul nachhan tarlangin, “Eizawnna tha kan neih theihna tur a nih bakah kan damkhawchhuahna tur atana kan inmamawh tawn vek vang a ni,” a ti a. Dan in a phal chinah, a man hun takah chauh kan man a, a humhalh zawnga tan kan lak chuan an inthlahpung anga, kan ram mipuite tan sumdawnna pawimawh tak a nih theih thu a sawi a. Kan ram intodelhna atana pawimawh em em luidunga cheng nungchate chu humhalh thiam a, man phal chin bituk thiam a pawimawh thu a sawi a, a lian leh ei tham chauh man-a an no pai laiin an lo inthlahpun zel theih nan zuah thin turin a chah a. Luidung nungchate kan nun tihlimtu leh kan ram tungdingtu anih theih nan tan la theuh turin a chah bawk a ni.

He hunah hian Minister hian Dapchhuah Branch YMA hnenah Incentive Award chawimawina Citation leh Rs. 20,000/- a hlan bawk.