Latest News

Nikum chhunga Serchhip DTO Office-a lirthei ziahluh zatve aia tam lirthei ke hnih nei a ni

Nikum 2022 chhunga Serchhip District Transport Officer (DTO) Office-a lirthei ziahluh thar zinga a zatve aia tam chu lirthei ke hnih nei (Two Wheeler) a ni.
    Serchhip DTO Office atanga thu kan dawn danin nikum chhung khan Serchhip DTO Office-ah hian lirthei ziahluh thar 743 awmin heng zinga 451 te chu Two Wheeler an ni a, lirthei ziahluh zawng zawng atanga za zela 60.69 zet a tling phak a ni. Hei bakah hian nikum-a lirthei ziahluh thar zingah hian 150 te chu LMV a ni a, lirthei chi dang 142 ziahluh a awm bawk a ni. Serchhip DTO Office-a thawk te chuan Serchhip District-a lirthei pundan chu a danglam ve reng tih sawiin, tunhnaiah hian lirthei ke hnih nei hi a pun nasat thu te, NH. 54 laihzauh tura Compensation semchhuah laiin a punna hi a sang deuh emaw tih tur te a nih thin thu an sawi bawk.

Serchhip DTO Office-a thawktute chuan nikum chhung khan Chhiah chi hrang hrang Rs. 1,20,07,816/- an hmuh thu pawh sawiin, heng te hi MV Fees (Registration, Renew fee, etc)-ah Rs. 39,84,690/-; MV Tax (Road Tax etc)-ah Rs. 44,20,995/-; Passenger Tax atangin Rs. 4,84,726/-; Goods Tax atangin Rs. 18,91,155/-; MVI ten Dan zawmlo an man te atangin Rs. 4,91,100/- leh thildang (Parking fee etc) ah Rs. 7,35,150/- te a ni.

Mizoram sawrkar in Learner License dilna thehluh Online hmanga a kalpui hnuah dil an tlem hret nia a lan thu pawh thawktute chuan sawiin, amaherawh chu buaipui tur erawh an nei ve deuh reng tih an sawi a, Online hmanga dilna thehlut thiam lo, Office-a kal te chu DTO Office-a thawktu ten a theih anga an lo tanpui thin thu pawh sawiin, nikum chhung khan Serchhip DTO Office atangin Learner License 2448 pekchhuah a nih thu leh Driving License 1842 pekchhuah a nih thu an sawi bawk.

Lirthei neitute zingah Fee pek tur ang pe lo tam tak an awm thin thu pawh DTO Office-a thawktute chuan sawiin, tunah hian Road Tax pe lo mi 125 te chu thinna an thawnchhuak mek tih an sawi a, heng ba thinna an pek te hian ngai pawimawh se an duh thu sawiin, ba hi an pe lo reng a nih chuan an Motor Registration Cancel thlenga hremna lekkawh theih a ni tih an sawi a. Serchhip-ah Pollution Test-na hmun buaipui mek a nih thu leh mimal enkawltu tur thlan fel ni tawhin, khawl bun tur te tihfel a nih thuai an beisei thu an sawi bawk.

Comments

Popular News (Last 30 Days)