Serchhip-a Sa talhna hmun enfiah niin khawtlang hruaitute nen sawihona neih zui a ni

AH&Vety Department-a Joint Director (Planning & Monitoring) leh a thawhpuite chuan nimin khan Serchhip-a Sa talhna hmun hman loha awm chu tlawhin a dinhmun an enfiah a, Serchhip-a VC leh Sazuar Association aiawhte bakah Sub-Hqrs. YMA hruaitute kawmin he Sa talhna hmun hman tangkai dan tur hi an sawiho bawk.

AH&Vety Department-a Joint Director (Planning & Monitoring) Dr. C. Lalrintluanga leh Doctor dang pathum te hian nimin zing khan Aizawl atanga Serchhip rawn tlawhin chawhma lamah Serchhip Mualvawm ram-a Sa talhna hmun, Rural Slaughter House hawn tawh, tun thlenga hman tangkai loha awm hi an tlawh a, helai hmuna building sak tawh leh khawl dah tawh te dinhmun enfiahin an thil hmuh dan te hi thuneitu sang ah thlen leh tur a ni dawn a. Serchhip-a AH&Vety Department-a thawktu ten an lo tawiawm a ni.


Hemi hnu nimin chawhnu lam khan Serchhip P&E Veng-a AH&Vety Training Hall-ah Serchhip khawpui chhunga VC hrang hrang leh Serchhip Sazuar Association aiawhte bakah Serchhip Sub-Hqrs. YMA hruaitute chu thutkhawm neihpui lehin Sa talhna hmun chungchang hi sawiho a ni a. Serchhip DVO Dr. R. Lalmakthanga kaihhruai he huna kalkhawmte hian Serchhip-a Rural Slaughter House hi Bawng leh Vawk talhna atan hman tangkai ngei duh tlangin, chutiang tur hian Department in cheibawlin hma la se an ti a, harsatna hrang hrang sawilan zingah Tui leh Eng tha taka pek a nih theih nan Department in hma la se an ti a, helai hmuna Sa talhna In chu a zim deuh avangin a kawt zawl chu a chung zar zawm nise an ti bawk a, hemi atan hian Department chu hma la tura beisei an ni.

He thutkhawm ah hian AH&Vety Joint Director (P&M) Dr. C. Lalrintluanga chuan Rural Slaughter House hman tangkai chu sawrkar duhdan a ni tih sawiin, heng hmun te hi sawrkar in sum tam tak senga a siam niin hetianga hman tangkai loha a awm reng chu a tha lo tih a sawi a. Mizoram hmundang ah te pawh hetiang Sa talhna hmun hi ruahman belh zel tur a ni tih sawiin, Serchhip chu hmahruaitu nia hmang tangkai phawt tura a beisei thu a sawi bawk a ni.

Comments

Popular posts from this blog