OSD to CM in banna thehlut

Officer on Special Duty (OSD) to CM Rosangzuala chuan nimin khan Chief Minister Zoramthanga hnenah OSD to CM a nihna leh MNF Headquarters-a Adviser to CM a nihna atanga banna a thehlut.

    Mizoram sawrkar Department of Personnel & Administrative Reforms (DP&AR) Secretary chuan September 14, 2021 khan OSD to CM atan Rosangzuala S/o F. Lalsanga (L), Lungmual Aizawl chu ruat a nih thu hi a tarlang a, a, a awmna hmunpui chu Aizawl a ni ang a, engtik hunah pawh chawlhtir (terminate) theih niin lawmman/hlawh (honorarium) atan sawrkar atangin thla khatah Rs. 1 dawng tura tih a ni a, Mizoram sawrkara Secretary tlukpui (rank) a ni bawk a. Kum hnih leh thla 4 vel hnuah Rosangzuala hian banna hi a thehlut ta a ni.

Zawhna chhangin Rosangzuala chuan banna a thehluh chhan chu MNF Party boruak vang a ni lo tih sawiin, Chhungkaw lam enkawlna a hun tam zawk hman a duh vangte leh Social Media-a a chungchang neuh neuh tam lutuk thin a nin tawh vang a nih pakhat bakah, an Party thatna tur zawk a nih a rin vang a nih thu a sawi a. “Nikum-ah OSD to CM a nihna atanga ban/chawlh vawi 2 ka lo dil tawh,” a ti bawk.