Rualbanlote dawmkan kawnga thawk tha mi 2 hnenah State Award hlan a ni

Rualbanlote dawmkan kawnga thawk tha te chawimawina ‘State Award for the Welfare of Persons with Disabilities’ chu a vawi khatna atan hlanna hun hman niin Chhingpuii leh Commissioner Lalkiamlova te hnenah Chief Minister Zoramthanga chuan a hlan a ni.

    Commissioner for Persons with Disabilities Office leh Mizoram Rural Bank tangkawpin an buatsaih ‘State Award for the Welfare of Persons with Disabilities’ hlanna inkhawm CM Conference Hall-a neih ah Chief Minister chuan tun tuma State Award sem chu thil tih awm tak a nih thu leh mi hriat lar lova thahnemngai taka lo thawkte chu fakawm a tih thu a sawi a. “Persons with Disabilities kan tihte hi an harsatna neih ang nei ve lote ang bawka hlawhtlinna nei thei an ni. Chutiang tur chuan puihna leh indawmkan erawh a tul thin a ni,” tiin, hetiang kawnga thawktute chu fak an phu hle tih a sawi bawk.

State Award for the Welfare of Persons with Disabilities hian thuziak leh pawisafai Rs. 30,000/- a keng tel a, Award dawngtu Chhingpuii hi Spastic Society of Mizoram (Society for Rehabilitation of Spastic Children) dintu zing a mi a ni a, Rualbanlote tanpui dan tur chungchang chi hrang paruk vel a ziak a, NIEPID Secunderabad siam rualbanlo chungchang thu chi hrang hrang Brochures 10 chuang Mizo tawng-in a lehlinsak a. Rajiv Gandhi Foundation tanpuina in lehkhabu chi hrang hrang engemaw zat chu Mizo tawng-in a let tawh bawk a. Ama hmalakna hian RGF hnuaiah rualbanlote tan bik liau liau film pakhat siam a ni tawh bawk.

Commissioner Lalkiamlova hian Mitdel hawrawp (Braille) bakah Home Management leh anmahni enkawl leh kaihhruai dan a zir a. Kum 1976-a Kalimpong-ah Text book te Braille-a chhut sakin Mizoram-ah School tan tur a nih avangin Mizoram Primary School zirlaibu zawng zawng pawh Mitdel hawrawp in a siam nghal vek bawk. January 1977 atangin Kolasib-ah Mizoram Mitdel School hmasa ber chu tanin April 15, 1977-ah Official-a hawn a ni a, School chu Integrated School ti-a letin, Mitvarte leh mitdel te chu zirna sikul pakhatah zirtirna inang pek an ni ta a ni. School-a a thawh loh hnuah pawh mitdel naupang te hi a buaipui zui zel a, hei mai bakah hian Mitdel ten anmahni hawrawp ngeia Bible an chhiar theihna turin theihtawp a chhuah a. SCERT thawhpuiin Mitdel hawrawp (Braille) tihchangtlunna turin theihtawp a chhuahpui bawk a, Zirlaite tanpui turin 'English and Mizo Braille Primer' bu pawh a siam a ni.