Huaisen chawimawina dawng tur mi 4 zingah Serchhip District naupang pahnih an tel
Mizoram State Council for Child Welfare thawktute sawi danin kumin a Mizoram atanga huaisen chawimawina dawng turte hi Vanlalfela, Jolyn Malsawmsanga, Lalramliana leh Christian Vannunzira niin President hnen atangin an dawng dawn a. Vanlalfela, Jolyn Malsawmsanga leh Lalramliana te hi nikum lama huaisen lawmman dawng tura thlan tawh te ni mah se hripui vanga Republic Day lawmna urhsun taka neih a nih theih loh avangin kumin hian Christian Vannunpuia te nen a rualin an dawng dawn ta a ni. Mizoram atang hian naupang huaisen lawmman dawng hi mi 40 an awmna a ni a, an zinga 13 hi thih hnua dawng an ni.
Tarlan tawh angin Christian Vannunzira (9) s/o Rosangzuala, Chhingchhip Venghlun hi a unau 3 te nen an khua atanga metre 150 vela hla Chhungatuikawn an kal laiin Khawivanrial rualin an zuk a, an nau Noel Vannunhlimi chu Khuai in a zuk lohna turin Christian-a a hian hmanrua a hmuh ang ang hmanga chhanin a hnua Maxi Cab lokal ten an puih hnuah khuai hi hnawhkian an ni a. Naupang 4 te hi damdawi in panpui an niin Christian Vannunzira hi khuai hian a zuk nasat avangin ni 6 chhung enkawl a ni. A unau te chhan nana a hnathawh avang hian huaisen lawmman dawng tura thlan a ni.
Chawimawia dawng tur dang Vanlalfela (10) s/o Lalrinthanga Thenzawl Venghlun (Lungrang) khua hi a pa nen Nov. 24, 2020 khan an huan-ah hnathawka kalin an hnathawh zawh hnuah a pa chu chawhmeh zawngin tlang-ah a lawn chho a, a rawn chhuk lam chu a thingzar vawn chuan dawl lovin a lum a, a pa thi chhawnga awm leh thisen chhuak chu buaipuiin khawchhung lamah zualko in YMA te a pun hnuah mi tlawmngai ten an lak hnuah damdawi In panpui a ni a, a pa pawh hian ziaawm lam panin a huaisenna leh ngaihtuahna fing tak avangin lawmman dawng tura thlan a ni.
Lalramliana (11) s/o Lalrinchhana, New Hruaikawn hi a thianpa Joseph Malsawm-tluanga (13) s/o Suiliamkhama nen August 2, 2021 khan khua atang KM 1.5 vela hla Kurung lui-ah Mautuai khawrh tura kalin Mautuai an khawrh zo tui a an cheng chu Joseph-a hi tuiah a tla a, Lalramliana hian tui tla chu chharin a Awm ah nemin thawk tir leh tumin vawi tam taka a nem hnuah a thianpa hi lo harh lehin a nunna a chhan a ni.
Jolyn Malsawmtluanga (15) s/o Lalmuan-kima, Pukpui (Lunglei) hian Nov. 30, 2022 tlai khan Pukpui Health Sub-Centre a Ambulance hluihlawn tawha naupang infiam zinga mi Moses Lalruatfela (11) chu electric in a man a, naupang hi a chhanchhuah vanga huaisen chawi-mawina hi dawng tura thlan a ni bawk.
Heng Mizo naupang 4 te hian January ni 17, 2023 khan New Delhi an thleng tawh a, ruahman dan chuan January ni 30,2023-ah Aizawl an lo let ang a, January ni 31-ah Social Welfare Minister Er. Lalrinawma chuan a Pisa-ah thingpui a inpui dawn a ni.
Huaisen lawmman dawngtu te hi Rs. 40,000 pek an nih bakah thilpek chi hrang hrang an dawng thin a, pawl 12 an zir thlengin scholarship pek an ni a, vanduaithlak taka an boral anih chuan an unau ten an dawng chhunzawm thei a. Pawl 12 an pass hnua Technical Line an zawm duh chuan Seat reserve sak an ni bawk.
Comments
Post a Comment