Family Oriented SEDP hnuaia hmalakna thlirho

Nimin khan Lawngtlai-ah District Level Socio-Economic Development Policy (SEDP) Committee chu an Chairman leh Lawngtlai Bawrhsap Amol Srivastava hova thukhawmin Line Department hrang hrangte hmalak dan an thlirho.

    He thutkhawm ah hian Lawngtlai DC chuan SEDP chu District chhunga kut hnathawktute'n an chhawr theih dan ber tura kalpui a nih theih nan Line Department-te chu theihtawp chhuah tur leh beneficiary-te kaihhruai leh vil zui kawngah tha thlah lova thawk zel turin a chah a ni. Lawngtlai District-ah hian Line Department 8 hnuaiah SEDP beneficiary 4,500 awmin SEDP tanpuina 1st instalment chu pek kim an ni tawh a ni.

Nimin vek khan Kolasib-ah pawh Family Oriented Socio Economic Development Program (SEDP) hnuaia hamthatna dawngte hmalak dan thlirletna hun hman a ni a, he hun hi Kolasib DC John LT. Sanga chuan kaihruaiin Family Oriented SEDP kalpuitu Sawrkar department hrang hrangte chuan an enkawl Office kaltlanga hamthatna dawngtu thlanchhuahte hnenah 1st Installment hi November 2022 hmain an pekchhuah vek thu an sawi a. Heng hamthathna dawngtute hi Department a thawktute hian an hmalakna an enpui thin thu leh Sericulture hnuaia Pangang khawi kawngah hmasawnna hmuh tura awm thu te, Agriculture hnuaia Vaimim tharchhuak an awm tawh thu te leh ranvulh tura hmalakna tha taka kalpui a nih thu te tarlan a ni.