Serchhip District-a Police te thubuai ziahluh ah rukruk leh a kaihhnawih thubuai a tam fal hle

Serchhip District chhunga Police Station hrang hrangah kum kalta (2022) chhung khan thubuai 161 ziahluh niin heng zinga a zatve aia tam, thubuai 95 zet chu rukruk leh a kaihhnawih a ni a. Nikum chhung khan Serchhip District Police te hian Heroin kg. 2.456 zet an man bawk a ni.

Serchhip SP Office atanga thu kan dawn danin kum kalta (2022) January atanga December thla thleng khan Serchhip District chhunga Police Station hrang hrangah thubuai 161 zet ziahluh awmin heng zinga 138 te chu Charge Sheet siam niin thubuai 10 te erawh Final Report siama chinfel a ni tawh a, thubuai chhui lai 13 ala awm mek bawk a ni. Serchhip District Police te kum kalta chhunga thubuai an ziahluh zingah hian rukruk kaihhnawih thubuai a tam fal hle a, rukruk leh a kaihhnawih thubuai hi 95 zet ziahluh niin hei hi thubuai ziahluh zawng zawng atanga chhutin za zela 59 lai a tling phak a, kum engemaw chen chu thubuai ziahluh zingah rukruk leh a kaihhnawih hi a tam ber a ni tawh a ni.

Rukruk leh a kaihhnawih bakah hian damdawi leh ruihtheih thil kaihhnawiha ND&PS Act hnuaia thubuai ziahluh chu thubuai ziahluh zingah a tam pawl niin thubuai 18 ziahluh a ni bawk a, heng te hi Heroin leh Ganja man sak te an ni tlangpui a, nikum chhung khan Heroin kg. 2.456 zet man niin heng kaihhnawih ah hian mi 31 zet man an awm bawk a, Heroin an man hlut zawng hi International Market-a chhutin Rs. 12,28,43,000/- hu zet a ni. Nikum chhung vek khan Zu leh a kaihhnawih chungchangah MLP Act hnuaiah thubuai 13 ziahluh a ni bawk a, hursualna laka naupangte venhimna Dan, POCSO Act hnuaiah thubuai ziahluh 8 lai awm leh bawkin pawngsual thubuai pahnih ziahluh a ni bawk a, thubuai langsar zingah tualthah thubuai pakhat ziahluh a awm leh bawk a ni.

Serchhip Police te chuan tun dinhmun ah Serchhip District-ah hian Police Station pathum, Serchhip, Thenzawl leh North Van-laiphai Police Station te a awm tih pawh sawiin, Chhingchhip-a Out Post a awm bakah East Lungdar-ah Beat Post hawn a nih tawh thu leh Sailiamkawn-ah Police Check Post a awm bawk thu an sawi a. Serchhip District Police te hian pawikhawihna a thlen lohna tur te, pawi-khawihna a lo thlen palha chhuichhuah hna leh pawikhawihtu te hremna pek an nih theihna tur te’n theihtawp chhuaha hma an lak thin thu an sawi bawk a ni.