Nikum-ah piang 462 leh thi 364 chhinchhiah
Serchhip-a District Research Officer (DRO) Office atanga thu kan dawn danin Serchhip District-a khaw hrang hrangah Registrar of Births & Deaths mi 49 awm mekin heng mite hian an Veng leh khua theuh ah piang leh thi awmte chhinchhiahin Certificate an pechhuak thin a. Heta an chhinchhiahna atanga a lan danin nikum chhung khan Serchhip District-ah naupiang 462 awmin heng zinga 239 te chu mipa niin a dang 223 te hi hmeichhia an ni a, mitthi 364 awm bawkin an zinga 213 te chu Mipa niin a dang 151 chu hmeichhia an ni a, nau piang thar ah mipa leh hmeichhia an in thlauh loh laiin mitthi-ah erawh mipa hi 62 zetin an tam zawk a ni.
Serchhip DRO Office atang hian Birth Certificate leh Death Certificate tibo leh tichhia te bakah a hunlai-a lachhuak lo te pekchhuah thin ni bawkin nikum chhung khan Delayed Registration hmangin Birth Certificate 190 leh Death Certificate 18 pekchhuah a ni bawk a. Certificate tibo, tichhia leh siamtha duhte hnenah Birth Certificate 451 Re-issue niin Death Certificate 30 Re-issue a ni bawk.
Kum 2022 October thla atang khan Economics & Statistics Office atanga Birth & Death Certificate pekchhhuah chu Digitized /Computerised Certificate vek a ni tawh a, a nei tawh sa tan pawh Digitized /Computerised Certificate hi siam theih niin Search Fee Rs. 100/-, Certificate man Rs. 100/- leh Application Form man Rs. 20/-, a vaiin Rs. 220/- chawi a ngai a, Certificate la nei lo tan chuan Delayed Registration tih hmasak a ngai a ni.
Comments
Post a Comment