Serchhip-ah National Voters’ Day vawi 13-na hmangin BLO hnathawk tha te chawimawi

National Voters’ Day vawi 13-na chu nimin khan ramchhung hmundangte rualin Serchhip-ah pawh District Bawrhsap Nazuk Kumar IAS hovin hman a ni a, kumin-a National Voters’ Day-ah hian thupui atan ‘Nothing like voting, I vote for sure’ (Vote thlak tluk a awm lo, Vote ka thlak ngei dawn) tih chu hman a ni.

National Voters’ Day puala inkhawm Serchhip DC Conference Hall-a neih ah Bawrhsap Nazuk Kumar chuan National Voters’ Day chu Vote nei tharte leh a ni tawh sa ten Vote thlak huna vote kan thlak ngei tulzia inhrilhhriat nana hman thin a nih thu leh a pawimawh thu a sawi a. Mahni-a ro inrel ram neih hlutzia leh ram rorelna chelhtu tur mipuiten zalen taka kan thlang thei hlutzia kan theihnghilh leh vote thlakte hi kan ngaihlu lovang tih a hlauhawm em em tih sawiin, “Mipuiten ram hruaitu tur kan thlang thin hi kan ram rorelna innghahna bulthut a ni tih i vawng reng ang u,” a ti a. “Vawiin Voter te Ni ah hian kan District a Voters tharte leh Voters ni tawh zawng zawngte, vote thlak huna vote lo thlak ngei turin ka sawm nawn leh vek che u a ni,” a ti.

Voters thar ten Polling Booth a kal a, vote thlak chu an lo huphurhin an lo zak mai ang tih a hlauh thu pawh Bawrhsap chuan sawiin, “Chutianga han zahna tur emaw, han thiam loh tur thil harsa engmah a awm lova. Kan ram hi kan nu leh pa kan pi leh puten hah taka thisen chhuaka an lo sual chhuah kha a ni tih vawng reng ila, mi tha leh mi dik kan tihte ngeiin an kaihhruai zel theih nan voters ten dikna kan dinpui ngam tur a ni a, kan vote hlu tak hi kan hralh mai mai tur a ni lo,” tiin dik taka an duhna tilang ngam turin a ngen bawk.

He hunah hian District Election Officer ni bawk Nazuk Kumar hian Election Commission of India hla, ‘Main Bharat Hoon’ tih chu a tlangzarh a, Voters thar thlanchhuah thalai thenkhatte hnenah EPIC hlanna a nei nghal bawk.

Serchhip SDO (Sadar) kaihhruai he hunah hian Deputy District Election Officer Lalmuansanga Ralte chuan kalkhawmte lawmna thu a sawi a. India ram hi inthlang ram kan ni tih kan hriaa, mahni duhzawng leh vei zawng pawh sawi theih lohna ram te nena khaikhin chuan kan vannei takzet a ni, a ti a. “Inthlang ram-a a thlangtu (voter) ni thei kan ni hi lawm ila, a hunah vote thlak ngei pawh kan tum tur a ni. Candidate vote duh kan nei lo a nih pawhin NOTA vote theihna kan nei lehzel a, hei hian vote thlak a pawimawhzia min hrilhfiah bakah kan duhna tihlanna hun tha pek kan nihzia a tichiang em em a ni,” tiin voters ten vote kan thlak ngei a pawimawhzia a sawi bawk.

National Voters’ Day puala hun hman ah hian Election Officer Lalrinchhani kaih-hruaina hnuaiah Voters tharte EPIC hlanna neih a nih bakah EPIC leh Adhaar inthlunzawmna lama thawk tha, za zel-a za (100%) thlunzawm thei Booth Level Officer (BLO) 9 hnenah te, a number a EPIC leh Adhaar thlunzawm tam (percentage ni lo) BLO hnenah te leh za zela 98 chunglam thlunzawm thei BLO 11, an vaiin BLO thawk tha mi 21 te hnenah lawmman hlanna neih a ni a. Constituency anga chhutin 27- Tuikum AC ah hian 94.02% thlunzawm tawh niin hei hi Mizoram puma a sang ber ni mek nia hriat a ni a, 26-Serchhip ah 71.53% leh 28-Hrangturzo ah 78.90% thlunzawm tawh niin District anga khaikhawmin 80.84% thlunzawm tawh a ni.

Nimin-a he hun hmanna ah hian F. Lalnisai, SDC kaihhruaiin kalkhawmte hian Voter Intiamna thuchham cham rualin hei hi sawrkar Pisa hrang hrangah chham a ni bawk.