Serchhip-ah India Republic Day vawi 74-na District Bawrhsap hovin urhsun taka hman a ni

India Republic Day vawi 74-na chu nimin khan ramchhung hmundangte rualin Serchhip-ah pawh Sports Complex-ah urhsun taka hman a ni a, Serchhip District Bawrhsap Nazuk Kumar IAS chuan India Hnam Puanzar pawt parhin Parade Contingent te Chibai buk a chhanglet a, mipuite hnenah thuchah a sawi bawk.

Bawrhsap chuan India ramin zalenna hmua a chhunga cheng mipuiten kan duan ngei ram Danpui (Constitution) kan nei chu a ropui em em tih sawiin, Danpui tha tak zarah kan ram chu kum reilote chhunga khawvela ram thil tithei leh ropui berte zinga mi ah kan inhlangkai tih a sawi a, “Mizoram pawhin hmasawnna a hmu nasa em em a, kan District ngei pawh Mizoram chhunga hmasawnna hmu nasa berte zinga mi kan ni awm e,” tiin tunhnaia sawrkar hmalakna hrang hrangte a tarlang nghal bawk.

Mipuiten nun ralmuang kan neih theih nan Police Department ten nasa taka hma an lak thu Bawrhsap chuan sawiin, kum 2022 chhung khan thubuai 161 ziahluh niin heng zinga 137 chu Chergesheet siamfelin, an zinga thubuai 10-ah Final Report an siam thu leh a dang 14 te chu chhui mek a nih thu a sawi a, thubuai ziahluh zinga 17 chu ND&PS Act hnuaia mi a nih thu leh Excise & Narcotics Department pawhin ND&PS Act hnuaiah thubuai 60 an ziahluh thu a sawi bawk.

PMAY Grameen, AwaasPlus tia sawi chu kalpui thar a nih thu Bawrhsap chuan sawiin, hemi hmang hian Serchhip RD Block-a chhungkaw 226 leh East Lungdar RD Block-1 chhungkaw 200, a vaiin chenna In 426 sakna tur Ministry of Rural Development in phalna an rawn pe tawh tih a sawi a, heng zinga chhungkaw 266 te tan a thawhkhatna sum pawh rawn pekchhuah a nih tawh thu a sawi a. Samagra Shiksha kaltlangin zirlai 5079 te hnenah aa thlawna Zirlaibu semchhuah a nih thu leh zirlai 6733 te hnenah Chawchhun pek a nih thu pawh sawiin, zirlai 11 te chu a bika tanpuina kumtin Rs. 4000/- pek an nih thu a sawi bawk.

PMAY (Urban) hnuaiah Serchhip Town chhunga chhungkaw 323 te chenna In tur sak zawh tawh a nih thu pawh Bawrhsap chuan sawiin, DAY-NULM hnuaiah thalai 916 te chu thiamthil zirna-ah zirtirna pek an nih tawh thu a sawi a, Swachh Bharat Mission (Urban) hnuaiah Serchhip District chhungah Vantlang inthiarna (Community Toilet) 17 leh Individual Household Latrine 1181 sak a nih tawh thu a sawi bawk.

Mizoram Sawrkar Flagship Prog-ramme, SEDP hnuaiah Line Department hrang hrang ten tanpuina an semchhuah tawh thu pawh he hunah hian Bawrhsap chuan a sawi a, kum 2020-2021 ah khan khaw 36 atangin Vaimim Metric Ton 3167 tharchhuah a nih thu leh heng te hi Agriculture Department chuan an leisak tih a sawi a, Horticulture Department huaiah thei leh thlai chi hrang hrang tharchhuah a nih thu bakah Zikhlum quintal 14,814 zet thar-chhuah a nih thu a sawi bawk.

Heng bakah hian Rashtriya Gram Swaraj Abhiyan (RGSA) hmangin VC House thar pakua leh a dang 11 thawmthat hna thawh a nih thu te, Keitum leh Khawlailung inkar Tuichang lui-a Lei dawh thar chu hawn theiha peih thawkhat ni tawhin kum kal mek chhungin PMGSY hnuaia khaw karkawng pathum thawh zawh a nih thu leh pakhat thawk mek a la awm thu a sawi a. Nu leh naupangte hnena chawtha pek hna kalpui mek a nih thu a sawi bakah sawrkar Department dangte hmalakna hrang hrang pawh a tarlang bawk a ni.