Central YMA leh MTP hruaitu ten inkawmna nei

Central YMA hruaitute leh Mara thalai pawl, Mara Thyutlia Py ( MTP) hruaitute chu nimin khan Aizawl-a Central YMA Office-ah an inkawm.

    He inkawmna hi Central YMA President R. Lalngheta chuan kaihruaiin thawhhona leh Mizo Hnam inpumkhatna tha a awm theihna tura MTP hruaitute Central YMA Office-a an leng chu lawmawm a tih thu a sawi a. Inpumkhatna a awm loh chuan Mizo hnam dinchhuahna tak tak a awm loh thu leh Central YMA CEC thutkhawm hnuhnung berah YLA hruaitute nen inkawmhona neih nise tiin rel a nih tawh thu a sawi bawk.

He inkawmna ah hian MTP Hqrs. atangin Asst. General Secretary N. Solomon Beihlothe leh Adviser bakah hruaitu dangte an tel a, he hunah hian Mizoram-a tlawmngai pawl lian - YMA, MTP leh YLA te Mizo hnam inpumkhatna atan thawhho a tul thu te, Zohnahthlak Hnam hrang hrangte tawng vawnhim a tul thu leh inpumkhatna atan kan tawng tualleng, Mizo tawng hman uar a tul thu te sawi a ni a. Ram leh hnam humhalh nan kawng hrang hranga thawhho a tulna te leh ram hmasawnna hnathawh enpui chungchangah pawh inthuruala hmalak a tul thu te an sawi bawk a. Hun remchangah kokim zawkin YMA leh MTP mai ni lo, Young Lai Association (YLA) hruaitute nen inkawmho a thawhhona siam dan kawng zawn nise an ti.

Central YMA, MTP leh Central YLA hruaitute hian kum 1998, 2004, 2006 leh 2016 khan inkawmhona leh thawhhona an lo siam tawh a. Kum 2016 khan Aizawl Sipai Lammual-ah Joint Cultural Meet pawh an lo hmangho tawh nghe nghe a ni.