Latest News

Mizoram-a mi 61 ten TB vei enkawllai te tanpui; Nikum-ah TB vanga thi mi 59 an awm

Vantlang atanga TB damlo te chawtha hmanga tanpuina Programme, Pradhan Mantri TB Mukt Bharat Abhiyaan, Community support to TB Patients hnuaiah Mizoram-a mi 61 ten TB vei enkawllai te an tanpui mek a. Nikum chhung khan Mizoram-ah TB vangin mi 59 an thi thung.

Pradhan Mantri TB Mukt Bharat Abhiyan hi sawrkar laipui Scheme niin kum 2025-a India ram atanga TB umbo tumna kawnga hmalakna pakhat a ni a. He hmalakna hnuaiah hian TB damlo te chu mimal, NGO, Institution leh a dang, tute pawhin chawtha hmangin thla 6 (ruk) emaw kum 3 (thum) thleng tanpui theih a ni a. TB damlo hi duh zat zat tanpui theih niin TB damlo tanpuitu te hi Nikshay Mitra/Doners tih koh an ni. He hmalakna hnuaiah hian Mizoram-ah Nikshay Mitra/Doners hi mi 61 an awm mek a, TB damlo mi 120 ten heng tanpuina hi an dawng mek a, TB vei tanpui ngai hi mi sang khat chuang an awm nia chhut a ni.

TB vei tam tak hi chhungkaw harsa tak tak te an ni a, hei bakah hian he natna vei te hi an inenkawl chhung a reiin thla engemaw zat damdawi chi tam tak an ei a ngai a. Hei vang hian an hriselna te, eizawnna leh sum leh pai dinhmun ten a tuar em em a. Chawtha an mamawhna a nasat bawk avangin chawtha hmanga tanpui an nih chuan an dam theih nan nasa takin a pui dawn a. National TB Elimination Programme (NTEP) chuan mi inphal apiang te hnenah TB damlo tan Doner ni ve turin a sawm a ni.

National TB Elimination Programme (NTEP) Mizoram Report atanga a lan danin nikum (2022) chhung khan Mizoram-ah TB vei mi 2084 hmuhchhuah niin heng zinga mi 59 te chu TB vang hian an thi a, thi zinga mi 28 te hi Aizawl District chhung ami an ni. Nikum chhunga Mizo-ram-a TB vei hmuhchhuah 2084 zinga mi 388 te hi Private Laboratory atanga hmuhchhuah an ni a, TB vei hmuhchhuah zinga mi 333 te hi HIV positive an ni tih hmuhchhuah ni bawkin TB-HIV vei te hi TB vei zawng zawng atanga 15% lai a ni.

Hei bakah hian TB vei hmuhchhuah zinga mi 103 te chuan TB pangngai aia tihdam harsa, MDR-TB (Multi Drug Resistant) an vei tih hmuhchhuah niin TB vei 86% chu enkawl dam an ni bawk.

Comments

Popular News (Last 30 Days)