SWD Minister in Tawitlang Block MHIP Conference Hualtu khua ah a hmanpui

MHIP Sub-Hqrs. Serchhip hnuaia awm Tawitlang Block MHIP chuan nimin khan Hualtu khua ah Conference hmangin he hun hmanpuitu bialtu MLA leh Social Welfare Minister Er. Lalrinawma chuan, “Hmeichhiate chhungkua, khawtlang, ram leh hnam thilah an pawimawh zia hi sawifiah phak a ni lo,” a ti.
Hualtu Community Hall-a Tawitlang Block MHIP Conference vawi 11-na hian Er. Lalrinawma chuan MHIP members-te Conference chibai bukin, “Hmeichhiate chhungkua, khawtlang, ram leh hnam thilah an pawimawhzia hi sawifiah phak a ni lova, an sukthlekin nasa takin kawngro a su zel thin,” tiin “Ram leh hnam huap thilah pawh MHIP ten hmalakna ropui tak tak an nei tawh thin a, an chhunzawm zel pawh ka beisei a ni,” a ti a. Kan fate hnenah ngaihhlut tur dik kan zirtir uar a tul thu sawiin, “Ram mipuiten nunkawng dik kan zawh deuh deuh theih nan mahni fate theuh hnena taima taka kan tuh thin a tul hle a ni,” a ti a, Hnam dang nena inchimralna laka kan him theihna tur kawngte, mahni hnam ziarang hlut thiamna lam thilte, Zonun zemawi inzirtir zelna lam te pawh kan uar zel tul a tih thu a sawi bawk.

National Girl Child Day chu January 18-24 chhungin India ram pumah hman mek a nih thu pawh sawiin Social Minister chuan, “Beti Bachao Beti Padhao Scheme kaltlanga hman a ni a. Fanute venhim leh zir puitlintir chu Beti Bachao Beti Padhao thiltum pui ber a nih avangin Vawiin-a Conference thupui, ‘Tu leh fate ruihhlo laka fihlim tura tan lak’ tih nen pawh a inmil hle a ni,” a ti a. BBBP hmanga sawrkar hmalakna kal mek te pawh tarlangin, BBBP chu hmeichhe naupangte hmasawnna tura sawrkar laipui hmalakna pawimawh anih avangin MHIP member te pawhin ngaihven deuh deuh se a duh thu a sawi bawk.

Tawitlang Block MHIP Conference hi an President Lalsiamkimi chuan kaihruaiin an member boral mi 67 te sunna hun an hman bakah hruaitu hlun chawimawina hlan an ni a, he hun hi MHIP General Hqrs. Aizawl leh MHIP Sub-Hqrs. Serchhip hruaitute pawhin hmanpuiin thu an sawi a. ‘Naupang enkawl dan leh ruihhlo that lohna’ tih thupui hmanga thusawi ngaihthlak a ni bawk. Tawitlang Block MHIP hnuaiah hian MHIP Branch 19 awmin nimin-a Conference an hman ah hian an huamchhung khaw hrang hrang atangin member te an tel a ni.