MTP hruaitu ten Larsap hnenah harsatna thlen

Mara thalai pawl lian ber, Mara Thyutlia Py (MTP) hruaitute chuan nimin khan Governor Hari Babu Kambhampati kawmin Siaha District chhunga mipui tana thil an ngaihpawimawh hrang hrangte bakah Refugee chungchang leh NHIDCL company hnathawh chungchang te an sawipui.

    Governor Hari Babu Kambhampati hian MTP hruaitute hi Raj Bhavan-ah lo lawmin an kalchhan leh harsatna an neih te a zawt a, MTP hruaitute hi N. Solomon, Asst. General Secretary hova kalin MSO hruaitute pawh he hunah hian an tel bawk a, Governor hnenah Refugee ten harsatna an tawhte an sawi a. Raltlan mangang tak ten Assam Rifle sipai duty te laka harsatna an tawk fo thin chu pawi an tih thu sawiin, hei hi tihtawp a nih theih nan hma lak sak turin Governor chu an ngen a ni.

Hei bakah hian Siaha District-a National Highway lamlian sial mek NHIDCL leh BIPL Company te hnathawh chu MTP General Hqrs. Siaha Vigilance & Monitoring Cell ten'a an enpuina kawnga an duhthu a sam tawklohna thu pawh sawiin, Furpui thlen hma ngeia mipui nawlpui tana harsatana a thlenloh nan a kawng nawlpui zawh anih theihnan hmalakpui turin an ngen a ni.

Cellular Service Provider chungchang pawh he hunah hian sawiin, hmun kilkhawr zawk a nih avanga Service provider ten Service an pek that loh zia te an sawi a, Internet mai nilo Phone Call leh Message Service-ah te pawh Mizoram puma a harsatna hmun ber nia an rin thute an sawi a. Service Povider ten Service an pek that tawkloh avanga zirlai tam tak tana harsatna a thlen fo thu te, Internet hmanga eizawngtute tana harsatna a tam tawh ziate leh Siaha District mipui ten Network Connectivity tha zawk an thlakhlelh tawh zia thu te an thlen bawk a. Heng an harsatna te chinfel a nih theih nan Governor chu hma lak sak turin an ngen a ni.

Governor hnenah hian chanchinthar-ah te Mara hming leh khua lamrik kawnga a lam dan dik taka puan a nih thin an beisei thu pawh MTP hruaitute hian sawiin, hemi kawngah hian DDK-ah te pawh Mara tawng thiam an thawh ve ngai nia an hriat thu an sawi bawk a. Kumin Independence Day Main Celebration Delhi a hman turah MTP General Hqrs. Cultural Troop ten ‘Sawlakia’ lam an pholan theihna tura kawng dap sak turin Governor hi an ngen bawk a ni.

Governor Hari Babu Kambhampati chuan MTP hruaitute thil thlen hrang hrangte chu uluk taka lo zirchian a tum thu leh a tul anga bawhzui a nih tur thu MTP hruaitute hi a lo hrilh bawk a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result