RD Block 27-na tur hawng

Mizoram-a Rural Development (RD) Block 27-na atan nimin khan Kawrtethawveng RD Block chu Chief Minister Zoramthanga’n a hawng.

    Chief Minister hian Kawrtethawveng-a BDO Office (Forest Rest House luah hawh mek) chu nimin khan hawngin Ngawngkawltlang a BDO Office building thar sakna tur lungphum a phum a. Hemi hnu hian RD Block lawmna inkhawm hi Kawrtethawveng Tennis Court-ah neih zui niin Chief Minister chuan Kawrtethawveng khua a lawmpui thu sawiin, kum 15 chhung zet RD Block neih theih nana beitu Committee in sawrkara an lo nawr tawhna te hriatpuiin, theihtawpa an lo beih tawhna in rah a chhuah chu Vawiin a mi te tan chauh ni lo, chhuan lo la awm leh zel tur atan hmasawnna thlentu a nih ngei a beisei thu a sawi a ni.

Khual zahawm RD Minister Lalruatkima pawhin Kawrtethawveng chu RD Block a puan satliah chauh ni lovin, a fu ke kim a BDO leh a Office turte nen tihfel vek a ni chu thil lawmawm tak a nih thu a sawi a. Hachhek bialtu MLA Lalrindika Ralte pawhin a bial chhunga RD Block thar hawn a ni chu lawmawm a tih thu a sawi bawk a ni.

Kawrtethawveng RD Block thar hi May ni 20, 2022 khan Zawlnuam RD Block atanga then hran niin khaw 21 leh Sub-Village pakhat (New Kawnpui) a awm a, RD Block hmasa Zawlnuam RD Block-ah hian khaw 35 a awm tawh dawn thung a ni. Kawrtethawveng RD Block-ah hian heng post BDO 1, Assistant 1, Inspector of Statistics 1, UDC 1 leh LDC 1 te chu nikum October 7 khan Sawrkar in a siam thar a, Block thar pahnih - Kawrtethawveng leh Tlabung RD Block te enkawl zuina turin cheng nuai 66.42 chu Finance Department in a allocate bawk a ni.

Comments

Popular posts from this blog