Latest News

Serchhip-a Goodwill English Academy ten Sports Complex-ah ‘Cultural Day’ an hmang

Serchhip-a Goodwill English Academy chuan nimin khan Serchhip Sports Complex-ah ‘Cultural Day’ an hmang a, Serchhip Sub-Hqrs. YMA President Kawlthuama chuan khuallian niin a hmanpui a ni.
    Goodwill English Academy Cultural Day-ah hian Serchhip Sub-Hqrs. YMA President chuan YMA chu kan pi leh pu te nundan tha leh kan Hnam zia te humhalha chhawmnungtu an ni tih sawiin, chumi hre renga Goodwill English Academy in Cultural Day-ah Serchhip Sub-Hqrs. YMA te khuallian atana an sawm chu lawmawm a tih thu a sawi a. Pi leh pu te atanga nundan phung leh Mizo hnam ziarang kan inzirtirna ber chu Zawlbuk a ni thin tih sawiin, tunah chuan Zawlbuk kan neih tak loh avangin zirna In hrang hrangah hetiang kan nunphung rinawmna, tlawmngaihna leh huaisenna bakah kan Hnam lam leh zai te inzirtirna hi kan kalpui chhoh tan tak thu a sawi a. Chutiang atana hun remchang tak hman a ni thin chu ropui a tih thu leh lawmawm a tih thu a sawi a, kan Mizo nundan tha leh nunphung te tuna naupang ni mek zirlaite-ah kan inzirtir chuan kan nunze mawi a parvul leh ngai a neisei thu a sawi bawk.


Serchhip Sub-Hqrs. YMA President chuan mahni Hnam nunphung leh Culture ngai hlu lo leh ngaisang lo chu an boral thin tih sawiin, khawvel hmundang te chauh ni lo, kan chhehvel State-ah te pawh hetiang hi an lo awm tawh thu a sawi a, hetianga Hnam boralna hi kan thlen ve lohna turin kan zirna In-ah zirlai naupangte chu kan pi leh pu te nunze mawi leh lam leh zai te kan zirtir zel a tul thu sawiin, kan pi leh pu te nunphung leh Hnam nunzia te chawisang deuh deuh turin he huna kalkhawm te chu a chah a. Goodwill English Academy chu zirna In thangduang tak a ni tih pawh sawiin, HSLC Exam result chhuak hnuhnung berah pawh result tha tak an nei tih an hriat thu a sawi a, hetiang dinhmun tha hauh reng turin duhsakna a hlan bawk.

Goodwill English Academy Cultural Day-ah hian he School Principal Lalramzauva Zote pawhin thu sawiin he hun an buatsaih chhan te a sawi a, he School-a zirlai naupang ten Tlang Lam, Chheih Lam, Cheraw, Sarlamkai, Chawnglaizawn leh Costume Parade te entirin zaithiam leh fiamthu thiamte nen hun hman zui a ni a, he hun hi he School-a zirlai nu leh pa te pawhin an hmanpui bawk a ni.

Goodwill English Academy hi Serchhip Ramthlun Veng-a awm niin Nursery atanga pawl 10 thleng zirna a awm a, zirlai naupang 600 chuang awmin Zirtirtu mi 20 vel an awm a ni.

Comments

Popular News (Last 30 Days)