Serchhip-in Cricket inelna lian a thleng dawn
Cricket Association of Mizoram (CAM) chuan kumin hian Mizoram District hrang hrangte Cricket a inelna tur buatsaih turin a rel a, he inelna hi Serchhip-a thlen tura ruahman niin niminpiah khan CAM hruaitute hi Serchhip-ah rawn kalin Serchhip District Cricket Association (SDCA) hruaitute nen Tourist Lodge-ah inkawmna an nei a, Inter-District Cricket Tournament hi thla thar February 14-17 chhung khian khelh relin DC Playground Khawtetlang-ah khelh tur a ni dawn a ni.
Serchhip in Inter-District Cricket Tournament a thlen tur atan hian ruahmanna hrang hrang siam nghal niin Committee peng pawh 4 din nghal a ni a, heng te hi Ground Management Committee, Media & Publicity Committee, Reception Committee leh Refreshment Committee te an ni a, heng Committee peng-ah hian mawhphurhna chelh tur inruatin tun thla ni 24 hmain tul leh mamawh hrang hrangte chu CAM Technical Committee hnenah thehluh a ni ang.
Inter-District Cricket Tournament-ah hian District tin atangin Mipa Team khat an tel thei dawn a, tunah hian a tel tur zat hriat chian la ni lo mah se District 6 emaw, 7 emaw tel tura beisei an ni a, lawmman pawh tha tak siam a nih tur thu CAM hruaitute chuan an sawi a ni.
Comments
Post a Comment