Serchhip DIET in National Achievement Survey atanga hmasawn turin Training buatsaih tan
Serchhip SDEO huamchhunga Primary School te tana ‘Post-NAS Training on Mathematics for Primary School Teachers’ hawnna hun Serchhip DIET Principal Lalrammawia kaihhruaia neih hi Serchhip DIPRO K. Saitluanga chuan hmanpuiin zirtirtu kalkhawmte fuihna thu a sawi a, Serchhip District chhungah Sawrkar enkawl zirna In ten hma an sawn zel theih nan Serchhip Bawrhsap hovin nasa taka tan lak anih dan te sawiin, Sawrkar hotu lu ten chan insema District chhung a Sawrkar zirna In hrang hrangte an tlawh thu a sawi a, heng zirna In dinhmun thlirin hmasawnna tur tam tak a awm thu te, sawrkar in zirlaite tan hamthatna tam tak a pe chung leh Zirtirtute pawh DIET atanga zirchhuak tha tak tak an awm chunga zirlai naupang an nei tlem thin chu a manganthlak thu leh tan lak ngaihna tam tak a awm nia a hriat thu a sawi a ni.
Serchhip DIPRO chuan Zirtirtu hna chu hna ropui tak, mawhphurhna sang tak leh pawimawh tak a nih thu pawh sawiin, “Lal Isua pawh lei-a alo kal khan nih theih tam tak nei mah se Zirtirtu nih a rawn thlang ta zawk a ni,” a ti a. He huna kalkhawm Zirtirtute chu an hnampui Mizote zirtirtu atan Pathian in a ruat an nih thu leh an pawimawhna thu sawiin, theihtawp chhuaha hmasawn an ngaihna lai a tan lak a pawimawh thu a sawi a. Staff Selection Commission (SSC) hnuaiah Mizote an tihthat tawkloh chhan pakhat chu Mathematics Subject-ah an chak tawk loh vang anih thu pawh sawiin, tan lak a a ngai tih a sawi a. Ram hmasawnna atan Zirlai naupang tha tak chherchhuaktu ni tura fuihin, hlawh chauh beisei, hna thawk tha peihlo Zirtirtu ni lo turin a chah bawk.
Kum kalta November thla khan India rampumah National Achievement Survey (NAS) hi neih niin Serchhip District-ah pawh neih a ni a, he Survey atanga hmasawnna tur awm leh zirlaite chaklohna ah hmasawnna a awm theih nan Post-NAS Training hi neih niin Subject dang-a Zirtirtute ten pawh neih zel tum a ni.
Comments
Post a Comment